Polsha bosh vaziri Berlinning Ukraina bo‘yicha pozitsiyasini tanqid qildi

Agarda Ukraina mudofaa masalasida Germaniyaga bog‘liq bo‘lganida, bu mamlakat bugunga kelib yo‘q bo‘lib ketgan bo‘lardi, dedi u Der Spiegel nashriga bergan intervyusida. 

Polsha bosh vazirining so‘zlariga ko‘ra, Germaniyaning siyosati Yevropaga ulkan zarar keltirdi va Berlin bilan ittifoq qiymatini jiddiy shubha ostiga qo‘ymoqda. 

Polsha har doim Ukrainaning qat’iy tarafdorlaridan biri bo‘lgan, ammo Germaniyaning pozitsiyasi Varshavaning «hafsalasini pir qilmoqda», dedi Moravetskiy.

«Berlin Rossiya energiyasiga qaramlik to‘g‘risidagi ogohlantirishlarni, xususan, Polsha uzoq vaqt qarshilik qilgan «Shimoliy oqim-1» va «Shimoliy oqim-2» quvurlarini inkor qilib keldi. Agarda Ukraina mudofaa masalasida Germaniyaga bog‘liq bo‘lganida, bu mamlakat bugunga kelib yo‘q bo‘lib ketgan bo‘lardi»,- dedi u.

Moravetskiyning ta’kidlashicha, nemislar har doim Moskvaga yon bosib kelgan, Rossiyaga bo‘ysungan.

«Ammo biz Rossiya borasidagi barcha ogohlantirishlarimizda haq edik. Hozir bizni avvalgiga nisbatan ko‘proq eshitishyapti»,- dedi u.