Xudoyor Meliyev adliya vaziri o‘rinbosari lavozimidan ketdi

O‘zbekiston adliya vaziri o‘rinbosari Xudoyor Meliyev egallab turgan lavozimidan ozod etildi. Vazirlik rasmiy saytidagi rahbariyat bo‘limidan u haqdagi ma’lumotlar olib tashlangan va vazir o‘rinbosari lavozimlaridan biri vakant ekani ko‘rsatilgan.

Xudoyor Meliyev nima sababdan lavozimdan olingani va uning keyingi faoliyati haqida ma’lumot yo‘q.

Xudoyor Meliyev 1980 yilda Samarqand viloyatida tug‘ilgan, 2000 yilda Toshkent davlat yuridik instituti bakalavr bosqichini, 2006 yilda esa ushbu OTMda magistraturani tamomlagan.

Mehnat faoliyati davomida Adliya vazirligida turli lavozimlarda ishlagan, xususan, vazirlikning Qonunchilik bosh boshqarmasi boshlig‘i lavozimida faoliyat yuritgan.

2019 yil yanvarida adliya vaziri o‘rinbosari lavozimiga tayinlangandi.

Ayni vaqtda adliya vaziri Akbar Toshqulovning uch nafar o‘rinbosari bor, bular: Alisher Karimov, Muzraf Ikromov hamda Sherzod Rabiyev.

Avvalroq ichki ishlar vazirining birinchi o‘rinbosari – Tezkor-qidiruv departamenti boshlig‘i polkovnik Shavkat Rahmonov ham lavozimini tark etgani to‘g‘risida xabar berilgandi.