Professordan tarbiyachigacha: pedagogik lavozimlar ro‘yxati belgilandi

O‘zbekistonda pedagogik faoliyat bilan bog‘liq lavozimlarning rasmiy ro‘yxati tasdiqlandi. Unga maktabgacha ta’limdan tortib oliy ta’lim muassasalarigacha bo‘lgan tizimdagi 465 ta lavozim kiritildi.

Adliya vazirligi Pedagogik faoliyat bilan bog‘liq lavozimlar ro‘yxatini davlat ro‘yxatidan o‘tkazdi. Mazkur hujjat 2026 yil 9 iyun kuni 3849-son bilan ro‘yxatdan o‘tgan.

Ro‘yxatda maktabgacha, umumiy o‘rta, o‘rta maxsus, kasbiy va oliy ta’lim tashkilotlarida mavjud bo‘lgan jami 465 ta pedagogik faoliyat bilan bog‘liq lavozim belgilangan.

Jumladan, professor, dotsent, katta o‘qituvchi, kichik o‘qituvchi, metodist, tarbiyachi, yo‘riqchi, uslubchi hamda boshqa qator lavozimlar pedagogik lavozimlar sifatida e’tirof etilgan.

Ma’lumot uchun, “Pedagogning maqomi to‘g‘risida”gi Qonunga muvofiq, ta’lim tashkilotida mehnat shartnomasi asosida ta’lim va tarbiya sohasida kasbiy faoliyat yurituvchi, tegishli ma’lumot, kasbiy tayyorgarlik va ma’naviy-axloqiy fazilatlarga ega jismoniy shaxs pedagog hisoblanadi.