Sankt-Peterburgda migrantlarga taqiq ortidan taksi narxlari oshdi

Sankt-Peterburg shahrida migrantlarning taksichilik qilishiga taqiq amal qila boshlagan kuni taksi narxlari 30 foizgacha oshdi. Bu haqda o‘z hisob-kitoblariga tayanib Fontanka.ru xabar bermoqda.

Jurnalistlar 6 va 7 noyabr kunlari tahririyatdan shaharning turli chekkalariga “Yandeks Taksi” xizmatining “Komfort” tarifidagi safarlar narxini solishtirgan. Taqiq amal qila boshlagan 7 noyabrda narxlar ko‘tarilib, bir kun oldingidan 3,2 foizdan 32,5 foizgacha farq qilgan.

Ayrim foydalanuvchilar taksi chaqirmoqchi bo‘lganida, ilovada: “Haydovchilar yetishmayapti, taksini uzoqroq kutishga to‘g‘ri keladi. Safarlaringizni ertaroq rejalashtiring. Jamoat transportida tezroq yetib borishingiz mumkin”, degan xabarni ko‘rgan.

“Yandeks Taksi” ma’muriyati migrantlarga yangi cheklov sababli Peterburgda kirakashlar soni 12 foizga kamayishini ma’lum qilgan. Gap 4 mingdan ortiq haydovchining ishsiz qolishi haqida ketyapti. Ekspertlar bu holat shundoq ham kadrlar yetishmovchiligi kuzatilayotgan sohadagi vaziyatni yanada og‘irlashtirishini qayd etgan.

Sankt-Peterburgda muhojirlarning taksi va kurerlik faoliyatlari bilan shug‘ullanishi gubernator Aleksandr Beglovning avgust oyidagi qarori asosida taqiqlandi. Rasmiylar bu qarorni “norasmiy bandlikka qarshi kurashish”, “xizmatlar sohasidagi xavfsizlikni oshirish” va “talabalarning ishga joylashishi uchun imkoniyat yaratish” kabi maqsadlar bilan izohlagan.