Саудия ТИВ: Башар Асад ёки истеъфога чиқарилиши, ёки куч билан алмаштирилиши керак

Сурия президенти ҳокимиятни топшириши керак, акс ҳолда можарони ҳарбий йўл билан ҳал қилишга тўғри келади. Ушбу сўзларни 29 сентябрь куни Саудия Арабистони Ташқи ишлар вазири Абдул ал-Жубайр Нью-Йоркда журналистларга маълум қилди.

“Асад учун Сурияда келажак йўқ, масалани ҳал этишнинг икки йўли бор, – деди вазир. – Биринчиси, бу – сиёсий жараён бўлиб, ушбу вақтда муваққат кенгаш ташкил этилади. Иккинчи йўли ҳисобланган ҳарбий аралашув ҳам Башар Асаднинг президентликдан кетиши билан якун топади”.

Ал-Жубайр Сурия етакчисини куч билан алмаштириш масаласига батафсил ёндашмасдан, фақатгина Ар-Риёд Дамашқ армияси ва ИШИД жангариларига қарши кураш олиб бораётган “мўътадил Сурия исёнчилари”ни қўллаб-қувватлашни бошлаб юборганини айтиб ўтди.