Америкалик жарроҳлар виртуал реаллик шлеми ёрдамида гўдакнинг юрагини операция қилишди

Nicklaus Children’s Hospital тиббий даргоҳининг жарроҳ-педиатрлари гўдакнинг юрагини муваффақият билан жарроҳлик амалиётидан ўтказишди. Бунда улар жарроҳлик амалиётидан ўтказиладиган органларнинг аниқ 3D-моделлари асосида, картондан ясалган Google Cardboard виртуал реаллик кўзойнаклари ёрдамида ишладилар, деб ёзади Quartz.

2015 йили Минессотада яшовчи оилада эгиз қизалоқлар Райли ва Тиган туғилди. Иккинчисида туғма равишда битта ўпка бор эди, юраги эса анча кичкина бўлиб, жойидан силжиган эди. Маҳаллий шифокорлар Тиганнинг хасталигини бедаво деб ҳисоблаб, тўрт ойлик болага алоҳида ғамхўрлик қилишни маслаҳат беришди, холос.

Аммо Майамидаги Nicklaus Children’s Hospital клиникаси докторлари операция ўтказишни ўз зиммаларига олди. Аммо, шифокор Редмонд Буркенинг сўзларига қараганда, магнит-резонанс томографияси ёрдамида олинган икки ўлчовли суратлар жуда сифатсиз бўлиб, операцияни ўтказишга йўл қўймаган.

Шунда МРТ бўлими раҳбари Хуан-Карлос Муниц икки ўлчамли суратлардан 3D-тасвирлар ҳосил қилиб, уларни смартфонга юклади. Бурке смартфонни виртуал реаллик кўзойнагига ўрнатиб, боланинг ички органлари тузилиши билан батафсил танишиб чиқди.

Орадан икки ҳафта ўтиб, операция бошланди. 7 соат давом этган операция декабрь ойининг охирида ўтказилди. Амалиёт муваффақият билан ўтказилди. Шундан сўнг шифокорлар қизалоқнинг ота-онаси билан биргаликда матбуот анжумани уюштирди.