Қозоғистонда учувчиларнинг инглиз тилини яхши билмаслиги авиаҳалокатга сабаб бўлган

2013 йилда Кўкшетов-Олма-ота рейсини амалга оширган SCAT авиакомпанияси CRJ-200 самолёти авиаҳалокати бўйича суд иши асосий тахминларни эълон қилди. Учувчиларнинг инглиз тилини кучсиз даражада билишлари самолётни ҳалокатга олиб келган сабаблардан бири сифатида қайд этилган.

Нашриёт мухбири берган хабарга кўра, SCAT учиш хизмати директори лавозимини 2007 йилдан бери эгаллаб келаётган Вячеслав Артеменко учиш ишини тўғри ташкил этмаганликда айбланмоқда. Прокурорлар маълумотларига кўра, Артеменко ҳалок бўлган учувчиларни ўқитиш ва малакасини оширишни керакли тарзда таъминламаган. Ҳаво кемаси командири Владимир Евдокимов ва иккинчи учувчи Александр Шарапов инглиз тилини яхши билишмаган. Бу эса CRJ-200ни бошқариш бўйича ўқув материалини ўзлаштиришга халал берган.

Прокурорнинг маълум қилишича, Евдокимовнинг учиш-штаб ҳужжатларида ҳақиқий бўлмаган сертификат нусхаси илова қилинган. Унга кўра, Евдокимов IKAO шкаласи бўйича зарур бўлган умумий ва авиацион инглиз тилининг тўртинчи даражасини намойиш этган. Ишни кўриб чиқиш жараёнида яна шу маълум бўлдики, авиакомпанияда меҳнат ва дам олиш режими тизимли тарзда бузиб келинган. Хусусан, ҳар йиллик меҳнат таътили вақтида экипаж хорижий тил ўқув марказида таълим олган.

SCAT учиш хизмати директорига Қозоғистон Республикаси Жиноят кодексининг 344 моддаси “Эҳтиётсизликка кўра икки ёки ундан ортиқ шахс ҳалокатини келтириб чиқарган ҳаракат хавфсизлиги қоидалари ёки ҳаво транспортидан фойдаланиш қоидаларини бузиш”га кўра, 4 йилдан 10 йил муддатгача озодликдан маҳрум этиш кўзда тутилмоқда.

Эслатиб ўтамиз, 16та йўловчи ва экипажнинг 5 нафар аъзосини ҳаётдан олиб кетган авиаҳалокат 2013 йилнинг 29 январида Қизилту посёлкасида содир бўлган эди. Қозоғистоннинг бош транспорт прокуратураси самолёт ҳалокатининг жиноят ишини судгача бўлган ўрганиш жараёни якунланганини маълум қилди. Унга кўра, ҳалокатга ёмон кўриниш шароитида экипажнинг иккинчи айланага кетишидаги хато ҳаракатлар асосий сабаб бўлган.