ОАВ: Анжелина Жоли ва Брэд Питт ярим йил Лондонда яшайди

Америкалик актёрлар Анжелина Жоли ва Брэд Питт фарзандлари билан ярим йилга Лондонга кўчиб кетади, дея ёзмоқда Daily Mail. Ушбу оилага таниш ахборот манбасининг тасдиқлашича, Британия пойтахтида Питт “Z оламлар жанги” фильмида суратга тушади. Маълумотларга кўра, актёрлар оиласи март ойида янги манзилига кўчиб келишади.

Янги картинада Брэд Питт бош ролни ижро этади. Шунингдек, у мазкур фильмда продюсер вазифасини ҳам бажаради. Питт фильмда суратга олиш жараёнида унинг турмуш ўртоғи Жоли гуманитар масалалар билан машғул бўлиши мумкин. Жумладан, актриса Европадаги қочқинлар масаласига оид тадбирларда иштирок этади.

Ахборот манбаси сўзларига кўра, Питт ва Жоли ўзларига Лондонда турар-жой сотиб олишни мўлжаллашмоқда. Бироқ ҳозирча улар бирор тўхтамга келишгани йўқ. Нашрнинг эслатишича, 2012 йилда Питт “Маслаҳатчи”, Жоли эса “Малефисент” фильмларида суратга тушганида, жуфтлик Лондонда турар-жойни ижарага олиб яшаган.