Канадалик "мерган ўқувчи" ўзининг акалари ҳамда мэрнинг қизини отиб ташлагани маълум бўлди

Канаданинг Саскачеван вилоятидаги Ла Лош шаҳарчасидаги мактабда содир этилган отишма натижасида қурбон бўлганлардан бири шаҳар мэри вазифасини бажарувчи амалдор Кевин Жанвьенинг 23 ёшли қизи бўлган. Ассошиэйтед нашрининг хабарига кўра, у шу мактабда ўқитувчи сифатида ишлаган.

Канада ҳуқуқ тартибот органлари ходимлари маълумотига кўра, Ла Лошдаги отишма оқибатида ҳалок бўлганлар сони 4 нафарни ташкил этмоқда. Шунингдек, 2 киши жароҳатланган.

Қотил мактабга йўл олишдан олдин уйда 2 акасини отиб ташлагани айтилган. Унинг акалари ва ўқитувчи қиз ўртасида танишлик бўлгани ҳақида аниқ маълумотлар берилмаган.

Қотилликнинг давоми содир этилган мактабда 7-12 синф ўқувчилари таҳсил олишган. Айни вақтда мактаб ҳудуди ўраб олинган, "мерган ўқувчи" қўлга олинган. Унинг исми ҳамда уни қотилликка ундаган сабаблар ҳақида маълум эмас.

Ла Лош қишлоғида 3 мингга яқин одам яшайди, улардан кўпчилигини туб халқлар вакиллари ташкил қилади.

Канададаги мактабдаги отишмада 5 киши ҳалок бўлди