Пауло Дибала: Мессига қарши эмас, у билан ёнма-ён тўп суришни истайман

Туриннинг «Ювентус» клуби ҳужумчиси Пауло Дибала Италия чемпионатининг 21-турида «Рома»га қарши кечган учрашувдан (1:0) сўнг берган интервьюсида «Барселона» ҳужумчиси, ўз ватандоши бўлмиш Лионель Месси билан бир жамоада ўйнашни исташи ҳақида айтиб ўтган.

У бу ўйинни каталонияликлар вакили Роберто Фернандес кузатиш учун келгани тўғрисидаги маълумотга қуйидагича муносабат билдирган:
«Очиғини айтганда, «Барселона» вакилларидан бири трибунада мени кузатиб бораётганидан хабарим йўқ эди.

Агар Месси мени мақтаган бўлса, бу албатта ёқимли. Мессига қарши ўйнашни истайман-ми? Йўқ, у билан рақиб бўлиб эмас, аксинча у билан бирга ўйнашни истайман», деган Дибала.

Ушбу аргентиналик ёш футболчи 2015 йилнинг ёзида «Палермо»дан 35 млн евро эвазига туринликлар сафига келиб қўшилганди.

Бундан олдинроқ «Барселона» ушбу футболчини 80 млн евро эвазига сотиб олишни истагани, аммо «Ювентус» раҳбарияти бу таклифни рад этгани тўғрисида хабарлар берилганди.

Маълумот учун, жорий мавсумда ушбу 22 ёшли аргентиналик ҳужумчи А Сериянинг 20та ўйинида майдонга тушиб, 12та гол ҳамда 9та голли узатмага муаллифлик қилган.