27 июнь куни Россия президенти матбуот котиби Дмитрий Песков Туркия раҳбари Ражаб Тойиб Эрдўған Владимир Путинга 2015 йилнинг 24 ноябрида уриб туширилган Су-24 самолёти учун узр сўраб мактуб йўллагани ҳақида маълум қилди. Песковнинг айтишича, Туркия президенти юз берган ҳодисадан афсусда эканини билдирган ҳамда учувчи Олег Пешковнинг ўлими юзасидан таъзия изҳор қилган ва бу оила учун товон тўланишини билдирган.
Ҳозирча учувчининг оиласига қанча миқдорда товон берилиши аниқ эмас. Буни Россия хукумати ёки учувчининг оиласи ҳал қилиши мумкин.
Қайд этиш керакки, “Озодлик флотилияси” билан боғлиқ воқеа учун Туркия Исроилдан 20 миллион доллар товон пули олганди (2010 йили Исроил махсус бўлинмаси томонидан Туркияга қарашли «Мави Мармара» паромининг қўлга олиниши чоғида туркиялик ҳарбийлар ҳалок бўлган).
Мактубда Туркия Россия бимлан алоқаларни бузиш нияти йўқлиги, Москва Анқаранинг стратегик ҳамкори экани таъкидлангани айтилди.
Ҳар икки томон шу вақтгача алоқалар тикланиши тарафдори эканлигини айтиб келар, аммо муносабатлар яхшиланиши учун биринчи қадамни қўйишда ҳеч бир томон қадам ташламаётганди.
Кремл томонидан берилган баёнотларда мулоқот қайта йўлга қўйилиши учун Анқара кечирим сўраши, ҳодиса сабаблари юзасидан тушунтириш бериши ва самолёт учун ҳамда учувчининг оила аъзоларига товон тўлаши лозимлигини айтиб келинарди.
Туркия раҳбарининг Россия президентига йўллаган мактубида “Оғриқни енгиллаштириш ва етказилган зарарни қоплаш мақсадида биз ҳар қандай ҳаракатларга тайёрмиз”, дейилган.
Таҳлилчиларнинг фикрича, бўшаб қолган Туркия пляжлари ва тўхтаб қолган Россиядаги қурилишлар ҳар икки мамакат иқтисодиётига зарар еиказгани аниқ. 21 июнь куни Hurriyet газетаси Антальядаги турсаноат инқирозга юз тутгани борасида хабар берди. 2016 йилнинг беш ойи давомида россиялик сайёҳларнинг Туркияга келиши 96 фоизга қисқариб кетди.
Туркиянинг узрини Россия қабул қилиши ёки қилмаслигини вақт кўрсатади. Шу ҳафтада ҳар икки президентнинг телефон орқали мулоқоти бўлиб ўтиши кутилмоқда.
Россия ва Туркия ўртасидаги алоқаларнинг изга тушиши билан боғқлиқ масалалар 1 июль куни Сочида Қора денгиз минтақаси Иқтисодий Кенгаши ташқи ишлар вазирларининг анжумани доирасида ҳам муҳокама қилинади. Анжуманда Туркия ташқи ишлар вазири Мавлюд Човушўғли иштирок этиши кутилмоқда.
Россиялик сиёсатчилар агар Эрдўғаннинг узри самимий бўлса, у ҳолда икки мамлакат ўртасидаги мулоқотлар давом этиши керак деган фикрларни айтишмоқда.
