Туркияга борувчи сайёҳлар сони кескин камаймоқда

2016 йил Туркия сайёҳлик индустрияси учун энг ёмон йиллардан бири сифатида қайд этилди. Ўтган йили мамлакатнинг Истанбул шаҳрига ўтган йилда ташриф буюрган хорижий сайёҳлар сони бўйича сўнгги 16 йилда илк марта пасайиш кузатилган. Европа ва Осиёни боғловчи шаҳарга 2016 йилда келган сайёҳлар сони 26 фоизга камайган ва 9,2 млн кишини ташкил этган, деб хабар қилмоқда Россия сайёҳлик операторлари Ассоциацияси. 

"Хорижий сайёҳлар сони камайиши АҚШ (-43,2 фоиз) ва Россия (-39,2 фоиз) ҳиссасига тўғри келади", — дейилади хабарда. 

Бундан ташқари, Туркиядаги бошқа дам олиш масканларига бўлган қизиқиш ҳам пасайиб бораётгани кузатилган. Хусусан, 2016 йилда Анталияга борган сайёҳлар сони 2004 йил кўрсаткичига тушган. Курорт ҳокимияти маълумотларига кўра, ўтган йилда Анталияга келган сайёҳлар сони 43 фоизга камайиб, 6 миллион кишини ташкил этган. 

Туркиянинг яна бир машҳур дам олиш маскани Бодрум ҳам 43,4 фоиз хорижий сайёҳлар оқимини бой берган. 2016 йилда бу ерга 453 минг дам олувчи келган, 2015 йилда бу рақам 797 минг нафарни ташкил этган.