Миср президенти Вашингтоннинг Қоҳирага муносабати ўзгарганини эътироф этди

Миср президенти Абдул Фаттоҳ Ас Сисининг қайд этишича, АҚШ президенти Дональд Трамп маъмурияти Мисрга авввалги раҳбариятга қараганда ўзгача ёндашмоқда, деб хабар қилмоқда Fox News.

Ас Сисининг айтишича, у аввалги президент Барак Обама маъмурияти билан унчалик келиша олмаган. Бироқ, Трамп билан бошиданоқ умуман бошқача муносабатлар йўлга қўйилмоқда. 

"Минтақадаги вазият ҳақиқий маънода англанмоқда", — деган Миср раҳбари телеканалга берган интервьюсида. "Минтақадаги экстремизм ва терроризмга қаршисида жиддий ва масъулиятли ҳаракатлар бор. Бу эса ажойиб. Ёвузликка қарши курашишдан яхши нарса йўқ", — деб қўшимча қилган давлат раҳбари. 

Трамп ва унинг мисрлик ҳамкасби Вашингтондаги учрашувда стратегик ҳамкорлик ва терроризмга қарши курашда кучларни мувофиқлаштиришни кучайтиришга келишиб олишган. Бундан ташқари, Трамп ва Ас Сиси Яқин Шарқ, шу жумладан Ливия, Сурия ва Яманда тинчликни тарғиб қилиш муҳимлигини қайд этишган. Улар, шунингдек, Исроил ва Фаластинни қўллаб-қувватлаш борасида ўзаро қизиқиш билдиришган. 

Таъкидланишича, мазкур ташриф Миср раҳбарининг сўнгги 8 йил мобайнида АҚШга илк сафаридир. 

Абдул Фаттоҳ Ас Сиси, шунингдек, Пентагон раҳбари билан хавфсизлик масалаларини муҳокама қилган. У АҚШ мудофаа вазири Жеймс Мэттис билан бирга терроризмга қарши курашда ҳамкорлик қилишга уринишларини изҳор қилишган. 

Шу билан бирга, Мэттис яқин орада Мисрга ташриф буюриши хабар қилинмоқда.