Норвегияда 3 минг йиллик артефактлар топилди

Норвегияда икки ҳаваскор археолог металл изловчи ускуна ёрдамида Норнхейм шаҳри яқинидаги фермер даласида қуроллар сақланувчи қадимий аслаҳахонани топишга муваффақ бўлишди. Омбордан бронза асрига тегишли 30 та артефакт олинди, болталар, найзалар ва мис асбоблар шулар жумласидандир. 

Олимлар нима сабабдан бу ерда шунча қурол сақланганига ҳозирча изоҳ бера олишмади. Археологларнинг сўзларига кўра, камдан-кам ҳолатлардагина бир жойдан шунча кўп қурол-аслаҳа чиқади. 

Ҳаваскорлар олимларга бу ҳақида хабар беришганидан кейинги қазиш ишлари билан Норвегиянинг Табиий ва техник фанлар университети профессионаллари шуғулланди, улар яна бир неча аслаҳа топишга муваффақ бўлишди. Барча предметлар эрамиздан аввалги 1100-500 йилларга тааллуқли экани маълум қилинган.

Олимларнинг сўзларига кўра, мазкур топилма хазинага тенг. Улар ушбу ҳудудда 3000 йил аввал одамлар яшаганини билишган, лекин шу кунга қадар артефакт топа олишмаганди.