Тошкентда «Инсон ҳуқуқлари ва ўзаро ҳамкорлик» мавзуидаги Фуқаролик форуми бўлиб ўтди

Фото: "Кун"

Бугун, 10 май куни Тараққиёт стратегияси марказида «Инсон ҳуқуқлари ва ўзаро ҳамкорлик» мавзусидаги Ўзбекистон Фуқаролик форуми бўлиб ўтди. Тадбир БМТнинг инсон ҳуқуқлари бўйича олий комиссари Зайд Раад Ал-Ҳусайн раҳбарлигидаги делегациянинг расмий ташрифи доирасида ташкил этилди. Форумда 50 га яқин нодавлат нотижорат ташкилот ва фуқаролик жамиятининг бошқа институтлари қатнашди.

Форумни ўтказишдан мақсад - инсоннинг олий қадриятлари - унинг ҳаёти, эркинлиги, ғурури ва бошқа ҳуқуқлари ҳимояси бўйича ўзаро фикр алмашиш ҳамда бу борада янги таклифларни ишлаб чиқиш бўлди.

Форумда Ўзбекистон Экологик ҳаракати, Журналистларни қайта тайёрлаш халқаро маркази, Ўзбекистон ишбилармон аёлларининг "Тадбиркор аёл" ассоциацияси, "Истиқболли авлод" ижтимоий-ахборот маркази, Демократия ва инсон ҳуқуқлари институти, Фуқаролик ташаббусларини қўллаб-қувватлаш маркази ва бошқа бир қатор ташкилотлар вакиллари иштирок этди.

Ўзбекистон Фуқаролик форуми Электрон ОАВ Миллий Ассоциациясининг қўллаб-қувватлаши остида ташкил этилди.

#БМТ #Ўзбекистон #Зайд Раад Ал-Ҳусайн