Бераҳм ота қорга йиқилган фарзандини тепкилади (видео)

Қирғизистон пойтахти Бишкекда бир эркак қишки ҳавода кўчада ётган кичик болани тепгани видеоси  Telegram’даги OMKS каналида жойлаштирилди.

“Мана кўчада қор ёғмоқда, бу эркак эса болакай бундай совуқда ерда ётганига бамайлихотир қараб турибди. Буни нормал ҳолат деб аташ мумкинми?”, деб сўрамоқда ролик ортидаги муаллиф. 

Эркак қор устига йиқилиб тушган бола тепасида қараб туради ва унга нималардир дейди. Шундан кейин чамаси 2-3 ёшлар атрофидаги болакай ўрнидан туришга ҳаракат қилади, лекин бунинг уддасидан чиқа олмай, яна қорга йиқилади. Шунда эркак боланинг белига қараб қаттиқ тепади. Зарбадан бола нарироққа учиб тушади. Кейин эркак болани қўлидан силталаб турғазиб, уни  тортқилаганча нарига олиб кетади. Эркак болани бундай тарзда хўрлагандан кейин, яна ўзича унга ғамхўрлик кўрсатиб қорга беланган кийимларини қоқиб қўяди. Видеони олаётган одам “бундай ота-оналарни нафақат жазолаш кераклигини” айтади.  

Видеода қайд қилинган ҳолат ижтимоий тармоқларда қизғин муҳокамага сабаб бўлди. Facebook фойдаланувчилари эркакнинг бу ҳаракатларини қоралаб, уни топиб, шафқатсиз  муносабат учун жазолаш кераклигини айтишган. 

K-News’нинг маълум қилишича, эркак милиция ходимлари томондан топилган. Аниқланишича, у боланинг ўз отаси бўлган. Эркак ушланиб, унга нисбатан “Безорилик” моддаси бўйича жиноий иш қўзғатилган.