АҚШда саккиз нафар бола отиб ўлдирилди

АҚШнинг Луизиана штатида жойлашган Шривпорт шаҳрида 19 апрель, якшанба куни эрталаб номаълум эркак уюштирган отишма оқибатида саккиз нафар бола қурбон бўлди. Яна икки киши жароҳат олган. Бу ҳақда NBC News телеканали ўз сайтида Шривпорт полицияси матбуот котиби Кристофер Борделонга таяниб хабар берди.

Полициянинг дастлабки маълумотларига кўра, ушбу ҳодиса оилавий зўравонлик ҳолати билан боғлиқ бўлиши мумкин. Полиция вакилининг баёнотида айтилишича, жиноят содир этилган ҳудуд бир маҳаллада жойлашган икки уйни, шунингдек, отишма бошланганидан сўнг жабрланувчилардан бири яширинишга уринган яқин атрофдаги яна бир уйни қамраб олган.

Хабар қилинишича, гумонланувчи жиноятчи автомашина ўғирлаб, қочишга уринган. Аммо Шривпорт патруль полицияси уни таъқиб қила бошлаган. Натижада, у полиция томонидан отиб ўлдирилган.

Хабар эълон қилинган пайтга келиб, ҳужумчининг шахси ва унинг эҳтимолий мотивлари ҳақида батафсил маълумот берилмаган. Шу билан бирга, полиция ҳалок бўлган болаларнинг айримлари мазкур эркакнинг қариндошлари бўлганини билдирган.

“Бу фожиали вазият, эҳтимол, Шривпортда ҳеч қачон содир бўлмаган энг оғир фожиалардан биридир”, — деди Борделон.

“Шу боис ҳозир биз барча маълумотларни синчиклаб ўрганамиз ва бу иш ишончли қўлларда”, — дея қўшимча қилди у.

Ўз навбатида, шаҳар мэри Том Арсено мотам эълон қилди.