НАТО иттифоқнинг расмий мадҳиясини маъқуллади

Шимолий Атлантика иттифоқи ўзининг расмий мадҳиясини маъқуллади. Бу ҳақда НАТО сайтида хабар берилган.

Ташкилотнинг мадҳияси аввал ҳам бўлган, бироқ у маъқулланмаган эди. Люксембург ҳарбий оркестри дирижёри, капитан Андре Рейхлинг композицияни 1989 йилда, НАТОнинг 40 йиллиги муносабати билан ёзиб берган. Ўшандан бери мадҳия турли тадбирларда, масалан 2017 йилнинг майида бўлиб ўтган бирлашма бўйича иттифоқчи мамлакатлар раҳбарлари учрашувида ижро этилган.

Композиция сўзларсиз чалинади. Мадҳия йигирмата мусиқа асбоби учун ёзилган: флейта-пикколо, флейта, гобой, учта кларнет, учта саксофон, иккита корнет, иккита труба, рог, баритон-рог, учта тромбон, труба ва барабан.