Хитойнинг “Тяньгун-1” орбитал станцияси Тинч океанига қулади

Хитойнинг “Тяньгун-1” орбитал станцияси Тинч океанининг жанубий қисмига қулади. Станция бўлакларининг катта қисми атмосферага кирганда ёниб кетган. Маълум қилинишича, станция кимсасиз ҳудудга тушган. 

Баъзида Ерга қулайдиган қолган коинот чиқиндилари каби, станциянинг қаерга қулашини аниқлаш мураккаб бўлган. Станция паст орбитада 27 минг км/соат тезлик билан ҳаракатлангани сабабли унинг тушадиган жойи ва вақтини аниқ айтишнинг иложи бўлмаган.

Станция қулаши олдидан унинг баъзи бўлаклари атмосферада буткул ёниб кетмаслиги ва аҳоли яшайдиган ҳудудга тушиши хавфи мавжуд бўлган. Яхшиямки, сайёрамизнинг катта қисми сув билан қопланган, қуруқликнинг катта қисми эса кимсасиз, бу эса станциянинг аҳоли яшайдиган ҳудудга тушиш имкониятини анча камайтиради. Aerospace Corporation мутахассисларининг таъкидлашларича, инсон устига коинот чиқиндисининг бирор бўлаги тушиши эҳтимоли триллиондан бирни ташкил қилади.

“Тяньгун-1” коинотга 2011 йилда учирилган. Станция орбитада бир неча йил ўтказгандан кейин уни орбитадан чиқариб, океанда назоратли чўктириш режалаштирилган. Бироқ Хитой 2016 йилда станция устидан бошқарув қўлдан чиқарилганини эълон қилган. Парвозлар маркази станциядан на сигнал ололган, на сигнал юборолган. Оқибатда станция пастлай бошлаган ва бу унинг қулашига олиб келган.