Янги Зеландияда аутизмдан азият чекувчилар учун "сокинлик соати" жорий қилинди

Янги Зеландиянинг Мартон шаҳридаги Countdown супермаркети аутизм касаллиги бўлган харидорлар учун "сокинлик соати"ни жорий қилди. Энди ҳар чоршанба куни соат 15:00 дан 16:00 гача дўконда мусиқа ўчирилади, чироқ хиралаштирилади, ишчилар эса дўкон автотураргоҳидаги аравачаларни йиғиб юришмайди.

Бундай ғоя оғир шаклдаги аутизмдан азият чекувчи Хантер исмли 13 ёшли ўғлини вояга етказаётган Лара Хогг томонидан илгари сурилди. Аёлнинг ўзи ушбу супермаркетда фаолият юритади. Дўкон менежери Кирстен Диннан аёлнинг ташаббусни қўллаб-қувватлади ва илк "сокинлик соати" 4 апрель куни бўлиб ўтди.

"Биз дўкондаги ҳар иккинчи чироқ ва ҳатто  музлатгич камераларидаги чироқларни ҳам ўчирамиз. Бундан ташқари, биз маҳаллий дўконга бориб, аутизмдан азият чекувчи болалар учун бир неча юмшоқ ўйинчоқ харид қилдик".

Кирстен Диннан

Мартонда ўнлаб кишилар аутизмга чалинган. Ўша ерда яшовчи Аннет Браун у ва ўғли учун дўконга бориш ҳақиқий "байрам"га айланган.

"Бизда Ирлен синдроми (миянинг визуал маълумотни қайта ишлаш тизимининг бузилиши), шунинг учун бу вақт барчамиз учун айни муддао. Дўконда у қадар ёруғ эмас, бизга шуниси тинчроқ. Бошим оғримайди ва ортиқча зўриқиш ҳис қилмайман".

Аннетт Браун

Таъкидлаш жоизки, "сокинлик соати"да дўконга барча харидорлар қўйилади, бироқ ишчилар улардан шовқин қилмасликни сўрашади. Бундан ташқари, маъмурият акция вақтида супермаркет "эътироздан холи зона"га айланишини таъкидлайди, зеро бу пайт аутизмга чалинганлар ҳақида салбий фикр билдирилишига йўл қўйилмайди.

Countdown матбуот котиби Кейт Портернинг сўзларига кўра, компания дўконлар тармоғи фаолият юритувчи бошқа шаҳарларда ҳам "сокинлик соати"ни жорий қилиш масаласини кўриб чиқмоқда.