Туркиянинг собиқ президенти сайловларга номзоди қўйилмаслигини маълум қилди  

Туркиянинг собиқ президенти Абдуллоҳ Гул Туркияда 24 июнда ўтадиган президент сайловларига ўз номзодини қўймаслигини маълум қилди.  

“Менинг номзодим қўйилиши ҳақида гап йўқ”, деб айтган Гул журналистларга.

Гулнинг айтишича, унинг номзодини қўллаб-қувватлаган Фаровонлик партияси бошқа мухолиф партиялар билан ягона номзод бўйича келиша олмаган. Собиқ президент Туркияда вазият оғирлиги ва мамлакатда турли фикрлик кучайганини айтган. Гулнинг таъкидлашича, сиёсатчилар “ўз манфаатларини давлатникидан устун қўймоқдалар”.

Аввалроқ Гул президент сайловларида турк мухолифатидан ягона номзод бўлиши мумкинлиги таъкидланаётганди. Гул мамлакатга Ражаб Тоййиб Эрдўғандан аввал, 2007-2014 йилларда президентлик қилган, 2002-2003 йилларда бош вазир бўлган. Гул ҳукмрон Адолат ва ривожланиш партияси асосчиларидан бири ҳисобланади, бироқ президент лавозимидан кетгач, партия юритадиган сиёсатдан узоқлашган.