Швейцария компанияси Тошкентда минг кишилик концерт зали ва меҳмонхона қуради

4 май куни Тошкентдаги “Маърифат” саройида Тошкент шаҳар ҳокими Швейцариянинг “Mabetex Group” компанияси президенти Африм Поколли билан учрашди. Учрашув чоғида икки томонлама ҳамкорлик, архитектура ва қурилиш ишлари юзасидан фикр алмашишди. Ҳокимлик матбуот хизмати шу ҳақида хабар берди. 

Томонлар ўзаро мулоқот чоғида Тошкент шаҳрида бунёд этилаётган ва келгусида режалаштирилаётган янги лойиҳалар тўғрисида сўз юритишди. Хусусан, Африм Поколли Тошкент шаҳар ҳокимининг таклифини маъқуллаб,  бир ярим ой муддатда  минг нафар томошабинга мўлжалланган кўп функцияли концерт зали ҳамда беш юлдузлик меҳмонхона лойиҳасини ташқи ва ички кўриниши мужассам бўлган тақдимотини ўтказишга ваъда берди.   

Маълумки Швейцариянинг “Mabetex Group” компанияси 1990 йилда ташкил топган бўлиб, ҳозиргача дунёнинг 16 ривожланган мамлакатида ўз лойиҳалари билан иштирок этиб келмоқда. Компаниянинг асосий иш тартибида катта–катта иншоотларни қуриш ва реконструкция қилиш, архитектура қўлланмаларини жорий қилиш ва улар устида ишлаш кўзда тутилган. Олмаота шаҳридаги Остона опера театри ҳам “Mabetex Group” компанияси лойиҳалари асосида қурилган.