Ал-Қудс фаластинликлар билан исталган тинчлик сулҳига қарамасдан, Исроил пойтахти бўлиб қолади. Бундай баёнот билан Исроил бош вазири Биньямин Нетаньяху исроилликлар томонидан Ал-Қудс куни сифатида нишонланувчи байрам ва АҚШ делегациясининг Ал-Қудсга келишига бағишланган қабулда айтиб ўтди.
“Фаластинликлар билан исталган тинчлик сулҳи доирасида Исроилнинг пойтахти Ал-Қудс бўлиб қолади. Биз АҚШ президенти Дональд Трампга Ал-Қудснинг Исроил пойтахти деб тан олиниши ва у ерга элчихонанинг кўчирилиши бўйича журъатли қарори учун миннатдормиз ва ҳамиша миннатдор бўлиб қоламиз. Трампнинг қарори оддий ҳақиқатни исботлайди: Ал-Қудс 3 минг йил, охирги 70 йилдан бери Исроилнинг пойтахти ҳисобланган ва абадий шундай бўлиб қолади”, деб айтган Нетаньяху.
АҚШнинг Ал-Қудсдаги элчихонаси 14 майда очилади. Шу муносабат билан Исроилга келган АҚШ делегациясига АҚШ давлат котиби ўринбосари Жон Салливан бошчилик қилмоқда. Делегация таркибига, шунингдек, АҚШ молия вазири Стивен Мнучин, Трампнинг катта куёви ва маслаҳатчиси Жаред Кушнер, қизи Иванка Трамп, Оқ уйнинг халқаро музокаралардаги махсус вакили Жейсон Гринблатт кирган.
Ал-Қудс мақоми Фаластин-Исроил ихтилофидаги асосий муаммолардан бири ҳисобланади. Исроилликлар шаҳарнинг шарқий қисмини 1967 йилги уруш вақтида эгаллаб олишган. Улар Ал-Қудс Исроилнинг “ягона ва ажралмас” пойтахти эканлигини таъкидлаб келишади. Фаластинликлар эса Ал-Қудснинг шарқий қисмини ўз давлатлари пойтахти қилишни исташади.
