Ўзбекистон Республикаси бош вазир ўринбосари Азиз Абдуҳакимов Францияга ташрифининг сўнгги кунида ЮНЕСКО бош директор ўринбосари Эрнесто Рамирез билан учрашди. У шунингдек ЮНЕСКО қошидаги Озарбойжон элчиси А.Каримов, Ангола элчиси А.Жозе, Буркина-Фасо элчиси А.Илбудо, Босния ва Герцеговина элчиси К.Муфтик ва Испания элчиси Т.Лизаранзу билан музокаралар ўтказди.
ЮНЕСКОда бўлиб ўтган учрашувда Ўзбекистон ва Ташкилот ўртасидаги муносабатларнинг ҳозирги ҳолати ва истиқболдаги чуқурлашуви ҳақида фикрлар алмашилди. Томонлар мавжуд ҳамкорлик салоҳиятини изчил амалга оширишдан ўзаро манфаатдор эканликлари таъкидланди. Бу ҳамкорлик ўзбек халқининг бой тарихий ва маданий мероси ҳамда ЮНЕСКОдек глобал ва нуфузли халқаро тузилманинг имкониятларига асосланган.
Рамирез Ўзбекистондаги тарихий-маданий меросни сақлашга доир қабул қилинаётган сўнгги чора-тадбирларни ижобий баҳолади. У икки томонлама ҳамкорликни кенгайтириш ва янги лойиҳаларни амалга оширишда ҳар томонлама қўллаб-қувватлашни таклиф қилди. ЮНЕСКО билан ҳамкорлик бўйича "Мамлакат дастури"ни биргаликда ишлаб чиқиш ва қабул қилишга қизиқиш билдирилди, унга ҳамкорликнинг амалий натижаларига эришишга йўналтирилган қатор аниқ қўшма чора-тадбирлар киритиш таклиф этилди.
Бундан ташқари, ЮНЕСКО штаб-квартирасида миллий кадрларни тайёрлаш ва мутахассисларни қайта тайёрлаш масалалари кўриб чиқилди.
