Хитой АҚШ билан бир қатор тадбирлардаги иштирокдан воз кечди

Фото: AP

Хитой Россия билан ҳамкорлик қилгани сабабли Вашингтон унга қарши санкциялар киритгани туфайли АҚШ билан бир қатор биргаликдаги тадбирлардаги иштирокдан воз кечди.

Аввалроқ Хитой ташқи ишлар вазирлиги АҚШ элчиси Гэри Локкни чақиртириб, унга Хитой Россия қуролини сотиб олиши сабабли киритилган санкциялар юзасидан кескин эътироз билдирган. Бундан ташқари, Хитой марказий ҳарбий кенгаши АҚШ элчихонасидаги ҳарбий атташега ҳам эътироз билдирган.

Хитой мудофаа вазирлигида таъкидланишича, Пекин Хитой ҳарбий-денгиз кучлари раҳбари Шэнь Цзиньлуннинг АҚШга ташрифини бекор қилган. Цзиньлун денгизда тинчликни қўллаб-қувватлаш бўйича симпозиумда иштирок этиши керак бўлган.

Бундан ташқари, Хитой ҳукумати Пекинда 25-27 сентябрга белгиланган, Хитой ва АҚШ қуролли кучлари бирлашган штаблари ўртасидаги мулоқот доирасидаги иккинчи учрашувдан воз кечган.

Хитой, шунингдек, Вашингтондан санкцияларни зудлик билан бекор қилишни талаб қилган, акс ҳолда жавоб чоралари кўрилишини айтган.

20 сентябрда Вашингтон Хитой марказий ҳарбий кенгашининг қўшинларни тайёрлаш ва таъминот департаменти ва унинг раҳбари Ли Шанфуга қарши санкциялар киритди. Кенгаш Хитой қуролли кучларига қўмондонлик қилади.

Оқ уйда санкциялар Хитойнинг “Рособоронэкспорт” билан ҳамкорлиги, жумладан Су-35 қирувчи самолётлари ва С-400 тизимларини сотиб олиши сабабли киритилгани айтилган.