Эрон АҚШнинг санкциялар киритиш одати назорат остидан чиқиб кетганини айтди

Эрон ташқи ишлар вазири Муҳаммад Жавод Зариф АҚШнинг санкциялар киритиш одати назорат остидан чиқиб кетганини айтди. У шу тариқа твиттердаги саҳифасида Вашингтон томонидан киритилган янги санкцияларга изоҳ берган. 

“АҚШнинг санкцияларни киритиш одати назорат остидан чиқди. Санкциялар киритилган тузилмалар орасига озиқ-овқат ва дори-дармон импорти учун ўта муҳим бўлган хусусий банк ҳам тушган”, деб айтган Зариф.

Зариф, шунингдек, АҚШ Эрон компанияларига санкциялар киритиб ҳуқуқнинг устуворлиги тамойилини бузаётгани ва бутун бир халққа нисбатан инсон ҳуқуқларини писанд қилмасликни намойиш қилаётганини айтган.

“АҚШнинг охирги икки санкцияси халқаро суд қарорларини бузади: гуманитар етказмаларга қаршилик қилмаслик ва зиддиятларни чуқурлаштирмаслик. Бу АҚШ ҳукуматининг эронликларга қарши жиноий душманлигидир”, деб қўшимча қилган эронлик вазир.

Аввалроқ АҚШ Эроннинг Ислом инқилоби қўриқчилари корпуси таркибига кирувчи “Басиж” қўшинини молиявий қўллаб-қувватлаётган тузилмаларга қарши санкциялар киритди. Санкциялар рўйхатига бош қароргоҳи Эронда жойлашган 20 та ташкилот, жумладан инвестиция компаниялари, молиявий гуруҳлар, рух олиш ва пўлат қуйиш корхоналари, банклар ва кооператив жамғарма тушган.