Трамп Ҳўрмуз бўғозидаги «Озодлик лойиҳаси» тўхтатилишини маълум қилди

АҚШ президенти Доналд Трамп Эрон билан тинчлик битими тузиш имкониятини баҳолаш учун Форс кўрфазида қолиб кетган кемаларни кузатиб бориш операцияси «қисқа муддатга» тўхтатилишини айтди.

Унинг сўзларига кўра, 4 май куни бошланган «Озодлик лойиҳаси» музокараларда воситачилик қилаётган Покистон ва бошқа давлатларнинг илтимосига кўра тўхтатилади.

Трамп бу қарор «улкан ҳарбий муваффақиятлар» ва Эрон билан тинчлик келишувига эришишда «сезиларли ютуқ» туфайли қабул қилинганини ёзди.

«Қамал давом этар экан, «Озодлик лойиҳаси» (Ҳўрмуз бўғози орқали кемаларни ўтказиш) келишувни якунлаш ва имзолаш имконияти бор-йўқлигини аниқлаш учун қисқа муддатга тўхтатилади», деб қўшимча қилди у.

Эрон давлат оммавий ахборот воситаларининг таъкидлашича, бу ҳолат Трампнинг жаҳон кемачилиги учун муҳим бўлган сув йўлини блокировкадан чиқаришга уринишларида «бир қатор муваффақиятсизликлардан сўнг ортга чекинганини» кўрсатади.

Трампнинг баёноти АҚШ давлат котиби Марко Рубионинг Оқ уйда ўтказилган брифингда февраль ойи охирида бошланган «Эпик ғазаб» операцияси ўз мақсадларига эришганини ва Вашингтон кейинги босқичга, яъни «Озодлик лойиҳаси»га ўтаётганини айтганидан кўп ўтмай эълон қилинди.

«Биз тинчлик йўлини афзал кўрган бўлардик. Президент келишув тузишни афзал кўради», деди Давлат департаменти раҳбари 5 май куни кечқурун.

Лойиҳа ҳақида гапирар экан, Рубио унинг фақат мудофаа характерига эга эканини таъкидлади. «Бизга биринчи бўлиб ўқ узилмагунча отишма бўлмайди», деб қўшимча қилди у.