“Лестер” клуби эгасининг вертолёти фалокатга учради

Англиянинг Лестер шаҳридаги “Кинг Пауэр” футбол стадиони ёнида “Лестер” клуби президенти Вишай Шривадданапрабханинг вертолёти фалокатга учради.

Sky News телеканалининг хабар қилишича, вертолёт парвоз қилгандан бир неча сония ўтиб назорат йўқотилган ва у қулаш вақтида ёниб кетган. 

ОАВ маълумотларига кўра, вертолётда Шривадданапрабха ҳам бўлган. У бу вертолётда ўйинлардан кейин Лестердан Лондонга қайтган. 

Воқеа Англия чемпионатининг 10-туридан ўрин олган “Лестер”-“ Вест Хэм” ўйинидан кейин содир бўлган.

Воқеа жойига полиция ва авария-қутқарув хизматлари етиб келган. Ҳозирча қурбонлар ва жароҳатланганлар ҳақида маълумот берилмаган.

Шривадданапрабха божсиз савдо дўконлари тармоғи King Power Duty Free асосчиси ва бош директори ҳисобланади. У “Лестер”ни 2011 йилда сотиб олган.