Аэропортларда йўловчиларнинг асабига тегадиган энг асосий нарсалар маълум бўлди

Одоб-ахлоқ қоидалари бўйича эксперт Жо Брайант икки минг британиялик ўртасида сўров ўтказди ва аэропортларда йўловчиларнинг асабига тегадиган энг асосий нарсалар рўйхатини тузди. Бу ҳақда Daily Mail хабар бермоқда.

Сайёҳлар ўртасида энг кўп норозиликка навбатсиз суқилиб киришга ҳаракат қилувчи йўловчилар сабаб бўлди. Бу вариант учун сўровда иштирок этганларнинг 57 фоизи овоз берди.

Рейтингнинг иккинчи қаторидан кутиш залидаги ўриндиқларга ўз юкларини қўйиб қўядиган саёҳатчилар жой олди (41 фоиз). Кейинги поғонада - аввалдан тайёрлаб қўймаган паспорти туфайли навбатда турган одамларни кутишга мажбур қиладиганлар (38 фоиз). Тўртинчи ўринда - хавфсизлик қоидаларини тушунмайдиган ёки уларга амал қилмайдиганлар (38 фоиз), бешинчи - юкининг оғирлиги ҳаддан ташқари кўп бўлган туристлар, улар чамадонларини очиб, нарсаларини қайтадан жойлайдилар ҳамда одамларни куттиришади (34 фоиз).

Бундан ташқари, асабга тегадиган нарсалар рўйхатига аэропорт ичида югуриб юрадиган йўловчилар ва бировнинг багажини хато туфайли олиб кетадиган туристлар кирган. Шунингдек, сўровда иштирок этганлар рейсга ўтиришдан аввал юзага келадиган навбатдан ҳам норозилар.