Хитойда Канаданинг икки фуқароси ҳибсга олинди. Бундан аввал Huawei асосчисининг қизи Канадада ушланганди

Канада Ташқи ишлар вазирлигининг маълум қилишича, тадбиркор Майкл Спавор Хитойда бедарак йўқолган. Бу ҳақда BBC News хабар бермоқда.

Хитой ТИВ хабарига кўра, у миллий хавфсизликка таҳдид солувчи ҳаракатларни содир этишда гумон қилиниб ҳибсга олинган.

Майкл Спавор 10 декабрь куни қўлга олинди. У Канада ҳукуматига уни сўроқ қилишаётгани ҳақида хабар йўллашга муваффақ бўлди. Шу билан бирга, Пекинда канадалик собиқ дипломат Майкл Ковригни шунга ўхшаш айбловлар билан ҳибс қилишди.

Канадада 1 декабрь куни АҚШ талаби билан Huawei асосчисининг қизи Мэн Ваньчжоу қўлга олинди. У компания молиявий директори ва директорлар кенгаши раиси ўринбосари ҳисобланади. 12 декабрь куни Мэн Ваньчжоу гаров эвазига озод қилинди, бироқ у ҳали ҳам АҚШга экстрадиция қилиниши мумкин.

АҚШ Мэн Ваньчжоуни Эронга нисбатан жорий этилган санкцияларни бузганликда гумон қилмоқда. Америка расмийлари версиясига кўра, Huawei Эронда бизнеси бўлган Skycom компанияси билан алоқаларини яширган. Мэн Ваньчжоу айбини тан олмади. 

Эслатиб ўтамиз, аввалроқ АҚШ Хитой билан «технологик урушни» бошламоқчи экани хабар қилинганди.