«Ўзбекэнерго» биноси жойлашган ерда меҳмонхона қурилади

Ўзбекистон Республикаси президенти “Ўзбекистон Республикаси Энергетика вазирлиги фаолиятини ташкил этиш чора-тадбирлари тўғрисида”ги қарорни имзолади.

Ҳужжат билан Ўзбекистон Республикаси Вазирлар Маҳкамаси, “Ўзбекнефтгаз” АЖ ва “Ўзбекэнерго” АЖнинг “Ўзбекэнерго” маъмурий биноси жойлашган ер участкасида хорижий инвесторларни жалб қилган ҳолда, замонавий меҳмонхона комплекси қуриш тўғрисидаги таклифларига розилик берилди.

Қайд этилишича, Ўзбекистон Республикаси бош вазирининг ўринбосарлари Э.М.Ғаниев ва А.А.Абдуҳакимов бир ой муддатда “Ўзбекэнерго” АЖ маъмурий биноси жойлашган ҳудудда замонавий меҳмонхона комплексини қуриш бўйича ҳукумат қарори лойиҳасини Ўзбекистон Республикаси Вазирлар Маҳкамасига киритади.

Давлат активларини бошқариш агентлиги Тошкент шаҳар ҳокимлиги ва “Ўзбекэнерго” АЖ билан биргаликда бир ой муддатда Вазирлик ва “Ўзбекэнерго” АЖни жойлаштириш бўйича Ўзбекистон Республикаси Вазирлар Маҳкамасига таклиф киритади.

Қарорда назарда тутилган маъмурий бино Истиқлол кўчаси, 6-уйда, Тошкент давлат юридик институти тўғрисида жойлашган.

Эслатиб ўтамиз, аввалроқ Мирзиёев қайта тикланувчи энергия манбаларини ривожлантириш концепциясини ишлаб чиқиш бўйича топшириқ бергани хабар қилинганди.