Трамп отаси туғилган давлатни яна адаштириб юборди

АҚШ президенти Дональд Трамп яна янглиш тарзда журналистларга отаси Фред Трамп АҚШда эмас, Германияда туғилганини айтган. Бу Оқ уйда НАТО бош котиби Йенс Столтенберг билан учрашувда юз берган.

Трамп ОАВ саволларига жавоб бериш вақтида Германия НАТО бўйича мажбуриятлари доирасида мудофаага “ўз улушини” тўлақонли тўламаётганини айтган. Шу билан бирга, у Германия канцлери Ангела Меркель ва Германия давлатини ҳурмат қилишини, отаси ҳам немис бўлганини таъкидлаб ўтган. “У немис бўлган ва Германиядаги ажойиб жойда туғилган, шу сабабли менда Германияга нисбатан ажойиб туйғулар бор”, деб айтган Трамп. 

The Washington Post нашри маълумотларига кўра, Трамп бундай хатога биринчи марта йўл қўймаяпти. Аслида Фред Трамп АҚШнинг Нью-Йорк шаҳрида 1905 йилда туғилган. Бироқ Трампнинг бобоси – Фридрих ҳақиқатан ҳам Германиядан бўлиб, 1885 йилда АҚШга эмиграция қилган. У Америкада муваффақиятга эришгач, Германияга қайтмоқчи бўлган, бироқ 1905 йилда рафиқаси билан бирга ноқонуний эмиграция учун АҚШга қайтариб юборилган. 

Ўтган йил ҳам Трамп бир неча марта отаси Германияда туғилганини айтган. “Эсингиздан чиқарманг, менинг ота-онам Европада туғилган: онам Шотландиядан, отам эса Германиядан”, деб айтган Трамп. Бунда АҚШ президенти онаси борасида ҳеч нимани адаштирмаяпти – Мэри Маклеод ҳақиқатан ҳам Шотландияда туғилган.