Movistar жамоаси велопойгачиси Ричард Карапас нуфузли кўп кунлик “Жиро д'Италия” велопойгасида ғалаба қозониб, Гранд-турда ғалаба қозонган илк эквадорлик бўлди.
Ғолибнинг якуний натижаси 90 соат 1 дақиқа 47 сонияни ташкил қилган. Пойга Веронада 17 кмлик масофага индивидуал пойга билан якунланган. Карапас бу босқичдан олдин ўзидан кейин келаётган италиялик Винченцо Нибалидан 1 дақиқа 54 сония олдинда бўлган ва бу натижа унга якунда пешқадамликни сақлаб қолишга етган.
Bahrain Merida жамоаси аъзоси Нибали 2-ўринни, 3-ўринни Jumbo-Visma вакили словениялик Примож Роглич эгаллаган.
Аввал тарихда эквадорлик велопойгачилар “Жиро”, “Франс” ёки “Вуэльта”да ғалаба қозонишмаган.
2019 йилги “Жиро д'Италия”нинг умумий узунлиги 3578,8 кмни ташкил қилган ва Италия ҳамда Сан-Марино ҳудудларидан ўтган.
