Дори воситаларини давлат рўйхатидан ўтказишнинг маъмурий регламенти тасдиқланади

Вазирлар Маҳкамасининг “Дори воситалари, тиббий буюмлар ва тиббий техникани давлат рўйхатидан ўтказиш ҳамда рўйхатдан ўтказилганлик гувоҳномасини беришнинг маъмурий регламентини тасдиқлаш тўғрисида”ги қарори лойиҳаси эълон қилинди.

Регламентга кўра, давлат хизмати Давлат хизматлари марказлари ёки Ўзбекистон Республикаси Ягона интерактив давлат хизматлари портали (ЯИДХП) орқали Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлигининг Дори воситалари, тиббий буюмлар ва тиббий техника экспертизаси ва стандартлаштириш давлат маркази томонидан кўрсатилади.

Давлат хизматлари марказлари ва ваколатли орган ўртасида ахборот алмашинуви электрон рақамли имзони (ЭРИ) мажбурий тартибда қўллаш орқали фақат идоралараро электрон ўзаро боғланиш ёрдамида амалга оширилади.

Дори препаратлари, тиббий буюмлар ва тиббий техникани рўйхатдан ўтказиш ариза берувчиларга гувоҳнома ёки дори воситаларига Давлат реестридан кўчирма берилишини назарда тутади.

Ариза берувчининг хоҳишига кўра гувоҳнома ўрнига дори препаратларига Давлат реестридан кўчирма берилиши мумкин.

Дори препаратлари, тиббий буюмлар ва тиббий техникани рўйхатдан ўтказиш ва гувоҳнома ёки дори воситаларига Давлат реестридан кўчирма бериш Давлат маркази томонидан мувофиқ схема бўйича амалга оширилади.

Қуйидагилар рўйхатдан ўтказилади:

дори препаратлари;

Ўзбекистон Республикасида рўйхатдан ўтказилган дори воситаларининг янги комбинациялари;

илгари Ўзбекистон Республикасида рўйхатдан ўтказилган, бироқ бошқача дори шаклларида, дозаларда ёки бошқа ишлаб чиқарувчи томонидан ишлаб чиқарилган дори препаратлари, тиббий буюм ва тиббий техника, бошқа ишлаб чиқариш майдонида ишлаб чиқарилган дори препаратлари, тиббий буюм ва тиббий техника;

тиббий буюмлар;

тиббий техника;

Ўзбекистон Республикасида биринчи марта ишлаб чиқилган дори моддаси (субстанция) Давлат реестрига киритилади ва Давлат реестридан кўчирма берилади.

Хорижий ишлаб чиқарувчининг хоҳишига кўра хорижий давлатда ишлаб чиқариладиган субстанция ҳам Давлат реестрига киритилади.

Таркибида турли дори моддалари бўлган дори препаратларини бир хилдаги савдо номи остида рўйхатдан ўтказишга йўл қўйилмайди.

Дорихоналарда тайёрланадиган дори воситалари ва тиббий буюмлар ҳамда илмий-тадқиқот ишлари учун олиб кириладиган, клиникагача тадқиқотлар, клиник тадқиқотлар ўтказиш ва давлат рўйхатидан ўтказиш, кўргазмаларда, ярмаркаларда, халқаро анжуманларда намойиш этиш учун мўлжалланган дори воситалари, тиббий буюмлар ва тиббий техника рўйхатдан ўтказилмайди.

Дори препаратлари, тиббий буюмлар ва тиббий техникани давлат рўйхатидан ўтказиш натижаларига кўра амал қилиш муддати беш йил бўлган гувоҳнома ёки Давлат реестридан кўчирма берилади.

Дори препаратлари, тиббий буюмлар ва тиббий техникани давлат рўйхатидан ўтказилганлик гувоҳномасининг ёки дори воситасига Давлат реестридан кўчирманинг амал қилиш муддати ҳар беш йилда кейинги беш йилга узайтирилади.

Гувоҳнома дори препаратлари, тиббий буюмлар ва тиббий техниканинг ёки Давлат реестридан кўчирма дори воситаларининг давлат рўйхатидан ўтказилганлигини ва Ўзбекистон Республикаси Соғлиқни сақлаш вазирлиги томонидан тиббиёт амалиётида қўлланилишига рухсат берилганлигини тасдиқловчи ҳужжат ҳисобланади.

Хорижий дори препаратлари, тиббий буюмлар ва тиббий техникани рўйхатдан ўтказиш ҳамда улар учун гувоҳнома ёки дори воситалари учун Давлат реестридан кўчирма бериш ушбу Низомга мувофиқ амалга оширилади.

 Дори препаратлари, тиббий буюмлар ва тиббий техникани рўйхатдан ўтказилганлик гувоҳномаси ёки дори воситалари учун Давлат реестридан кўчирма асосида тиббиёт амалиётида қўлланилишида ариза берувчи томонидан бажарилиши шарт бўлган талаблар ва шартлар қуйидагилардан иборат:

дори препаратлари, тиббий буюмлар ва тиббий техникани рўйхатдан ўтказиш учун мурожаат қилган ариза берувчи томонидан уларнинг тиббиёт амалиётида қўлланилишида қонун ҳужжатларига сўзсиз риоя этиш;

гувоҳнома ёки Давлат реестридан кўчирманинг амал қилиш даврида ариза берувчи томонидан Давлат марказига рўйхатдан ўтказиш ҳужжатларига ўзгартириш ёки қўшимчалар киритиш тўғрисидаги тўлиқ маълумотларни тақдим этиш;

дори воситалари, тиббий буюмлар ва тиббий техникага доир техник жиҳатдан тартибга солиш соҳасидаги норматив ҳужжатлар талабларига, дори препаратлари, тиббий буюмлар ва тиббий техникани рўйхатдан ўтказиш ҳужжатларида келтирилган маълумотларга қатъий риоя этиш;

Давлат маркази томонидан кўрсатилган камчиликларни ўз вақтида бартараф этиш, шунингдек, дори воситалари, табиий буюмлар ва тиббий техника намуналарини ҳамда бошқа материалларни назарда тутилган муддатларда тақдим этиш.