Олмалиқ шаҳри ҳам транспорт воситалари учун ёпилди

Бугун, 27 мартдан бошлаб Олмалиққа кириш-чиқиш йўллари ёпилиб, шаҳарда жамоат транспорти ҳаракати вақтинчалик чекланди.

Олмалиқ шаҳар ҳокимлиги хабарига кўра, 27 мартдан эътибор шаҳардаги барча турдаги жамоат транспортлари ҳаракати ҳам вақтинчалик чекланган.

«Олмалиқ шаҳрига фақатгина «Олмалиқ-Тошкент» йўналишида кириб-чиқиш учун стационар пост ташкил этилиб, ушбу пост шаҳарга ягона кириб-чиқиш пости ҳисобланланади.

Стационар постда автотранспорт воситаларининг кириб-чиқиш маҳаллий давлат ҳокимияти органлари, ҳуқуқ-тартибот идоралари, корхона, ташкилотларда ишловчи ходимларнинг автотранспорт воситалари мажбурий равишда дезинфекция қилинади», – дейилади хабарда.

Шаҳарга кириш ва чиқишдаги чекловлар юк ташиш билан боғлиқ ҳолларга, доимий яшовчи (рўйхатдан ўтган) шахсларга, маҳаллий давлат ҳокимияти органларига, ҳуқуқ-тартибот идоралари, шифокор ва ҳамширалар, санитария-эпидемиологик осойишталик маркази ходимларига нисбатан татбиқ этилмайди.

Эслатиб ўтамиз, бугундан бошлаб Ўзбекистонда вилоятлараро транспорт ҳаракати тўхтатилди.

Аввалроқ Тошкент, Наманган, Андижон, Гулистон, Қарши, Навоий, Бухоро ва Самарқанд шаҳарларига кириш ва чиқишда чекловлар ўрнатилган, Сурхондарё вилояти транспорт воситалари учун ёпилганди.
Коронавирус юқтириб олган беморлар ҳозиргача Тошкент шаҳридан ташқари, Бухоро, Фарғона, Андижон ва Наманган вилоятларида аниқланган.