Ёшлар парламенти аъзолари икки йил муддатга сайланиши, ҳар бир шаҳар ва тумандан бир нафардан вакил парламент аъзоси бўлиши кутилмоқда.
Бу ҳақда 11 май куни парламент қуйи палатасида ўтказилган Олий Мажлис палаталари ҳузурида Ёшлар парламентини ташкил этиш юзасидан ишчи гуруҳ йиғилишида сўз борди.
Ишчи гуруҳ йиғилишида депутатлар, Ёшлар масалалари бўйича комиссия аъзолари, Олий Мажлис ҳузуридаги Қонунчилик муаммолари ва парламент тадқиқотлари институти ходимлари, Ўзбекистон ёшлар иттифоқи вакиллари қатнашишди.
Олий Мажлис Қонунчилик палатаси спикерининг биринчи ўринбосари Акмал Саидов Ёшлар парламентининг асосий йўналишлари ҳамда вазифалари нималарда намоён бўлиши хусусида тўхталиб, ёшларнинг ҳуқуқ ва эркинликлари ҳамда қонуний манфаатларини ҳимоя қилишга оид қонун ҳужжатларини такомиллаштириш, қонун ижодкорлиги ва ҳуқуқни қўллаш амалиётининг долзарб муаммоларини ёшлар иштирокида муҳокама қилиш лозимлигини таъкидлади.
Йиғилишда ёшларнинг парламент фаолияти ва қонун ижодкорлигининг барча босқичларидан хабардорлигини ошириш, ушбу жараёнда кечадиган янги ва устувор йўналишларни белгилашда ёшларнинг фаоллигини, уларнинг сиёсий билимларини ошириш ва ватанпарварлик руҳини кучайтириш Ёшлар парламентини ташкил этишдан кўзланган мақсад экани айтиб ўтилди.
Йиғилишда тақдим этилган тақдимотга кўра, Ёшлар парламентининг аъзолари халқ депутатлари туман (шаҳар) кенгашлари томонидан ҳар бир шаҳар ва туманлардан бир нафардан икки йил муддатга сайланиши, ўз логотипи, аъзоларининг кўкрак нишонлари ҳамда белгиланган шаклдаги гувоҳномаларига эга бўлиши маълум қилинди.
Олий Мажлис Сенати раиси Танзила Норбоева 2019 йилнинг ноябрида 2020 йилда Ўзбекистонда ёшлар парламенти тузилиши мумкинлигини маълум қилган эди.
“Илм-маърифат ва рақамли иқтисодиётни ривожлантириш йили”да амалга оширишга оид давлат дастурида 2020 йил 1 июнга қадар Олий Мажлис палаталари кенгашларининг қўшма қарори лойиҳаси ишлаб чиқилиши ва унда Ёшлар парламентини ташкил этиш ва унинг таркибини шакллантириш тартибини белгиланиши айтилганди.
