Индонезия AstraZeneca’нинг вакцинасидан 100 миллион доза сотиб олади

Фото: iStock

Индонезия AstraZeneca британ-швед компанияси коронавирусга қарши ишлаб чиқаётган вакцинадан 100 млн доза сотиб олади. Бундай келишувга Индонезия ташқи ишлар вазири Ретно Марсуди ва давлат корхоналари вазири Эрик Тхохирнинг Лондонга ташрифи вақтида эришилган.

Таъкидланишича, вакцинанинг биринчи партияси Индонезияга 2021 йил бошида етказилади.

Индонезиянинг иқтисодиёт масалалари бўйича вазири Аирлангга Хартарто ўтган ҳафта келишувнинг умумий қиймати 500 млн долларни ташкил қилишини маълум қилганди. Октябрь охиригача ушбу сумманинг 50 фоизи тўлаб берилади.

Августда Индонезия делегацияси Хитой ва БААда бўлиб, сафарлар якунларига кўра Индонезияга умумий ҳисобда 300 млн доза вакцина етказилишини эълон қилган. Вакцинанинг биринчи партияси ноябрда етказиб берилиши кутилмоқда. Шундан кейин аҳолининг муайян тоифалари – тиббий ходимлар, полициячилар, ҳарбийлар, ўқитувчилар дарҳол вакцина билан эмлана бошланади.

Индонезияда пандемия бошидан бери 345 минг киши коронавирусга чалинган, улардан 12,1 минг киши вафот этган.

Аввалроқ AstraZeneca вакцинасининг Британиядаги синовлари вақтида синалувчилардан бирида тушунарсиз касаллик аниқланганди. Шу сабабли вакцинанинг ишлаб чиқарувчилари воситанинг хавфсиз эканига ишонч ҳосил қилиш учун танаффус олишганди.