АҚШ элчихонаси: Андрей ўзининг демократик тамойилларига бўлган садоқати билан кўпчиликни илҳомлантирган

АҚШ элчихонаси  шу йилнинг 29 октябрь кунида коронавирусдан вафот этган ўзбекистонлик олим Андрей Кубатин ва унинг адолат учун босиб ўтган йўлини 2 ноябрь куни эълон қилинган баёнотида ёдга олди.

«АҚШнинг Ўзбекистондаги элчихонаси яқинда қамоқдан озод этилган сиёсий маҳбус ва ҳурматли олим Андрей Кубатиннинг 29 октябрь куни 36 ёшида вафот этгани муносабати билан унинг оиласи, дўстлари, ҳамкасблари ва талабаларига чуқур ҳамдардлик билдиради. Биз у ва унинг оиласи билан танишиш шарафига муяссар бўлган эдик.

Ковидга қарши курашда мағлуб бўлишдан олдин, Андрей ўзининг демократик тамойилларига бўлган садоқати, шунингдек ўзининг фундаментал ҳуқуқлари бузилган чоғда адолатни ҳимоя қилишда кўрсатган шахсий жасорати билан кўпчиликни илҳомлантирди. Уни таниганлар ёки унинг тақдири тўғрисида билганлар унинг ушбу ҳуқуқлар учун тўғридан-тўғри ва самарали курашишга бўлган қатъиятидан таъсирландилар. У озодлик ва адолат сари интилаётганларнинг барчасига намуна эди», — дейилади баёнотда.

Кубатин 2019 йил декабрдан буён Ўзбекистон Фанлар академияси Миллий археология марказида фаолият юритиб келаётганди.

2019 йил 26 сентябрь куни Тошкент вилояти судида Кубатиннинг иши қайта кўриб чиқилган ва олим тўлиқ оқланиб, суд залидан озод этилганди. Тошкент давлат шарқшунослик институтининг катта ўқитувчиси бўлиб ишлаган ёш олим 2017 йили Жиноят кодексининг 157-моддаси («Давлатга хоинлик қилиш») назарда тутилган жиноятларни содир этишда айбланиб ҳибсга олинганди. Ўша йили Кубатинга нисбатан 11 йилга озодликдан маҳрум қилиш жазоси тайинланганди.

Кубатин ва унинг турмуш ўртоғи, олима Феруза Жуманиёзова Kun.uz'га интервью бериб, қизиқарли суҳбат давомида ҳаётларининг оммага маълум бўлмаган қирралари, илм ва олим тийнати, тарихчи олимни қийнаган муаммолар, шунингдек, илмий фаолиятлари ҳақида сўзлаб беришган.