Канадаликлар учун коронавирусга қарши вакцина бутунлай бепул бўлади

Айни пайтда Канадада коронавирусга қарши оммавий вакцинацияга тайёргарлик ишлари олиб борилмоқда. Давлат Буюк Британиядан сўнг иккинчи бўлиб коронавирусга қарши Pfizer/BioNTech вакцинасини фавқулодда вазиятларда қўллашга рухсат берди.

Соғлиқни сақлаш масалаларига бағишланган учрашувда Канада бош вазири Жастин Трюдо ҳукумат барча канадаликлар учун вакцина билан боғлиқ харажатларни қоплашини ва одамлар бепул вакцина олишини маълум қилди.

Маълум қилинишича, хавф гуруҳига кирувчи фуқаролар биринчи навбатда вакцина олади.

“Бир неча кун ичида илк 30 минг доза Канадага етказилиши кутилмоқда. Барча канадаликларга "сиз ёлғиз эмассиз" демоқчиман. Вакцина ҳаммамиз учун яхши хабар. Лекин унутманг, бу оммавий тадбир ва олдимизда узоқ қиш бор. Мен барча ҳудуд раҳбарларига федерал ҳукумат вакцина ва унинг таъминоти харажатларини қоплашини маълум қилдим. Канадаликлар учун вакцина дозалари текин бўлади, шунингдек, провинция ва маҳаллий ҳудудлар ҳам вакцина учун маблағ сарфлаши шарт эмас”, - деди бош вазир учрашувда.

Аввалроқ, Канада 40 миллиондан камроқ аҳолиси учун 154 миллион нафар кишига етадиган ҳажмда COVID-19 вакцинаси сотиб олгани, кейинги ҳафтадан оммавий вакцинация бошланиши мумкинлиги ҳақида хабар қилинганди.