Британия ва Малайзияда коронавируснинг янги штаммлари аниқланди

14 декабрда Англияда вируснинг юқумлироқ янги тури аниқлангани маълум қилинганди.    

“Бу иккинчи янги штамм катта хавотир уйғотмоқда, чунки у аввал аниқланган янги турдан ҳам юқумлироқ ва унга нисбатан янада мутация қилган”, деб таъкидлаб ўтган Хэнкок.

Унинг айтишича, мутахассислар ушбу янги тур билан икки киши касалланганини қайд қилишган. Уларнинг иккиси ҳам ЖАРдан келган.

Шу сабабли Лондон ЖАРга сафарларга чеклов киритди ҳамда у ердан келувчиларга ва касалланганлар билан яқин алоқада бўлганларга 2 ҳафталик  карантин жорий қилди.

Аввалроқ Хэнкок Англия шарқида коронавируснинг янги тури тарқалаётганини маълум қилганди. У таъкидлаганидек, ушбу штамм аввалгисига нисбатан 70 фоиз юқумлироқ ҳисобланади. Ушбу штамм сабабли ўнлаб давлатлар Британия билан халқаро авиаалоқани тўхтатишга қарор қилди.

Бундан ташқари, Малайзияда ҳам коронавируснинг янги тури аниқлангани маълум қилинди. New Straits Times нашрининг Малайзия соғлиқни сақлаш вазирлиги бош директори Нур Ҳишам Абдуллага таяниб хабар беришича, янги штамм Сабоҳ штатида олинган 60та намунада аниқланган.

“Биз ушбу вариантнинг клиник таъсирини, унинг юқумлилиги ва тажовузкорлиги даражасини ҳали ўрганиб чиқишимиз керак”, деб айтган Абдулла.