2021 йилда Поп–Наманган–Андижон темир йўл участкаси тўлиқ электрлашади

Поп–Наманган–Андижон темир йўл участкасини электрлаштириш лойиҳасини тўлиқ амалга ошириш бўйича режалар эълон қилинди. Ушбу лойиҳага 160,1 миллион доллар сармоя жалб этилиши назарда тутилган.

Водий вилоятларини боғлаб турувчи Поп–Наманган–Андижон темир йўл участкаси 2021 йилда тўлиқ электрлаштирилади. Бу ҳақда 2021–2023 йилларга мўлжалланган инвестиция дастурида маълум қилинди.

Ушбу лойиҳани амалга ошириш ишлари 2017 йилда бошланган ва 2021 йилнинг декабр ойигача тугалланиши айтилмоқда. Лойиҳа доирасида узунлиги 145,1 км темир йўл линиясини электрлаштириш режалаштирилган. Лойиҳанинг умумий қиймати 160,1 млн доллар бўлиб, Осиё Тараққиёт банки томонидан 80 миллион доллар хорижий кредит жалб этилиши назарда тутилган.

Шунингдек, инвестиция дастурида Поп, Қўқон ва Асака туманларида темир йўл линиясининг ташқи объектларини электр таъминоти билан таъминлашда таянч нимстанциясини қуриш ишлари 2021 йилнинг IV чорагига қадар тугалланиши белгиланган.

Бундан ташқари, дастурда бошқа темир йўл линияларида ҳам электрлаштириш бўйича лойиҳалар эълон қилинди. Хусусан, умумий узунлиги 135 км бўлган Мароқанд–Навоий темир йўл участкасини электрлаштириш ишлари 2022 йилда тугалланиши режалаштирилган. Лойиҳа қиймати 49,8 млн доллар.

Умумий узунлиги 452 км бўлган Бухоро–Урганч–Хива темир йўлини электрлаштириш ишлари эса 2020–2024 йиллар оралиғида амалга оширилиши режалаштирилган.

2020 йил 29 декабр куни президент Шавкат Мирзиёев парламентга мурожаатномасида 2021 йилда 2та тезюрар поезд ҳаракати йўлга қўйилиши, Бухоро–Урганч–Хива темир йўлини электрлаштириш ишлари бошланиши ҳақида маълумот берганди.

Маълумот учун, 2020 йилнинг 30 август куни Наманган–Андижон электрлаштирилган темир йўл линиясида илк йўловчи поезд рейси амалга оширилди. Мазкур темир йўлларни тўлиқ электрлаштириш орқали юк ва йўловчи ташиш сифатини ошириш, тезюрар поездлар қатновини шакллантириш ҳамда дизел ёнилғисида ҳаракатланаётган тепловозлар ўрнини замонавий электровозларга алмаштириш мақсад қилинган.

Темир йўл ҳалқасини электрлаштириш ишлари 3 босқичда амалга оширилмоқда. Биринчи босқич Поп шаҳридан бошланиб, Қўқон, Марғилон, Асака ҳамда Андижон ҳудудларигача бўлган йўналишларда амалга оширилди. Ушбу участканинг узунлиги 186 километрни ташкил этиб, 2016 йилда фойдаланишга топширилганди.

Иккинчи босқич 2019 йилда, узунлиги 45 километр бўлган Поп – Чуст – Тўрақўрғон – Раустон – Наманган оралиғида бажарилган. Сўнгги учинчи босқич эса Наманган – Андижон участкасини тўлиқ электрлаштириш билан якунланди.