Марказий банк: январь ойида Ўзбекистонда иқтисодий фаоллик пасайди, ишбилармонлик кайфияти яхшиланди

Марказий банк 2021 йил январь ойи учун «Иқтисодий фаоллик кўрсаткичлари» ҳисоботини эълон қилди.

Республикадаги 702та корхона ва ташкилотларда ўтказилган сўров натижасига кўра, иқтисодий фаоллик индекси мавсумий омиллар таъсирида ўтган йилнинг декабрь ойига нисбатан бирмунча пасайган, ишбилармонлик кайфияти индекси эса яхшиланган.

Хусусан, жорий йилнинг январь ойида иқтисодий фаоллик индекси 50,3ни ташкил этиб, ўтган йилнинг декабрь ойига (52,7) нисбатан 2,4 бирликка пасайган бўлса, ишбилармонлик кайфияти индекси (ИКИ) 65ни ташкил этиб, (2020 йил декабрь ойида 60,1) 4,9 бирликка ошган.

«Иқтисодий фаоллик индексининг пасайиши, саноат, қурилиш ҳамда савдо соҳаларида тармоқ иқтисодий фаоллик индексларининг декабрь ойига нисбатан мос равишда 2,7 (49,7дан январь ойида 47гача), 4,7 (49,4 дан январь ойида 44,7 гача) ва 8,2 бирликка (58,2 дан 50 гача) камайиши билан изоҳланади.

Шу билан бирга, жорий йилнинг январь ойида хизматлар соҳасидаги иқтисодий фаоллик кўрсаткичи ўтган йилнинг декабрь ойи даражасида сақланиб қолгани (иқтисодий фаоллик индекси 0,2 бирликка ошган) кузатилди», – дейилади ҳисоботда.

Шунингдек, ишбилармонлик кайфияти индекси барча тармоқларда ошган бўлиб, корхоналарнинг келгуси 3 ой бўйича иқтисодий кутилмалари яхшиланганини кўрсатмоқда.

2021 йилнинг январь ойида ишбилармонлик кайфияти индекси ўтган йилнинг декабрь ойига нисбатан қурилиш соҳасида 8,8 бирликка, хизматлар соҳасида 6,6 бирликка, савдо соҳасида 5,9 бирликка ҳамда саноат соҳасида 2,6 бирликка яхшиланган.

Ҳисоботда январь ойи якунлари бўйича ўтказилган сўров натижаларида саноат соҳасидаги корхоналарнинг айланма маблағлар билан таъминланганлик даражаси мавсумий омиллар таъсирида бирмунча пасайгани келтирилган. Хусусан, айланма маблағлар билан таъминланганлик ҳолати индексининг 3,5 бирликка пасайиши кузатилган.

Қурилиш корхоналарининг молиявий ҳолати ҳамда айланма маблағлар билан таъминланганлик ҳолати индекслари мос равишда 8,1 ва 10 бирликка пасайган.

Аввалроқ Ўзбекистонда иқтисодий фаоллик ва ишбилармонлик кайфияти индекслари 2020 йилнинг ноябрь ойида пасайганидан сўнг, декабрь ойида бирмунча яхшилангани хабар қилинганди.

Унга кўра, 2020 йил декабрь ойида иқтисодий фаоллик индекси (ИФИ) 52,7ни ташкил этиб, ноябрь ойига (51) нисбатан 1,7 бирликка, ишбилармонлик кайфияти индекси (ИКИ) эса 60,1ни ташкил этиб, (ноябрь ойида 57,4) 2,7 бирликка ошган.