Мижозлар билан энг ёмон ишлаётган банклар рўйхати эълон қилиб борилади

Марказий банк мижозларнинг шикоятлари асосида энг ёмон ишлаётган банклар рўйхатини эълон қилиб боради. Бу ҳақда 13 июн кунги Олий Мажлис Сенатининг ялпи мажлисида регулятор раҳбари Тимур Ишметов маълум қилди.

«Биз биринчи марта банкларнинг фуқаролар мурожаатлари билан ишлаш бўйича индексини ишлаб чиқдик. Келаси ҳафта энг ёмон кўрсаткичларга эга банкларни эълон қилишни бошлаймиз», — деди МБ раиси.

Тимур Ишметовнинг сўзларига кўра, бир ойдан кейин Марказий банк ўзининг ижтимоий тармоқлардаги саҳифаларида фуқароларнинг банк хизматлари бўйича мурожаатлари учун иккита канал очади. Бунда фуқаролар мурожаат билан чиқиши мумкин бўлади, банклар эса бир соат ичида жавоб бериши ва масалаларни ҳал қилиши керак.

Регулятор раҳбари Марказий банкнинг ўзида ҳам коммуникация борасида муаммолар бўлганлигини тан олган ҳолда, ўтган ойда колл-марказ янгиланиб, алоқа марказига айлантирилгани ва ҳозирда тест режимида ишлаётганини айтиб ўтди.

«Шунинг ҳисобига бизда мурожаатлар сони олти баравар ошди. Авваллари бизга ҳам етарлича қўнғироқ қила олмаган одамлар. Буни ҳозир синовдан ўтказяпмиз, бир-икки ойдан кейин эълон қилиб, ишлашни кенгайтирамиз», — деди Ишметов.