Испания қиролининг опалари БААда эмлангани можарога сабаб бўлди

ОАВда Испания қироли Филипп VI’нинг опалари – маликалар Елена ва Кристина БААда коронавирусга қарши эмлангани ҳақида тарқалган хабар испан жамиятида кескин муносабатга сабаб бўлди.

Маликалар Кристина ва Елена / Фото: G3online

El Diario нашрининг хабар беришича, 57 ёшли малика Елена ва 55 ёшли малика Кристина Абу-Дабида яшаётган отаси – Испаниянинг собиқ қироли Хуан Карлосни февралда кўргани борганларида БААда коронавирусга қарши эмланишган.

Қирол опаларининг танқид қилиниши Испанияда эмлаш дастури доирасида улар вакцина ололмаган бўлишлари, чунки бунда устуворлик биринчи навбатда кекса ёшлиларга ва юқори хавф гуруҳига кирувчиларга берилиши билан боғланган.

Ҳукмрон коалиция таркибига кирувчи “Подемос” партиясида қирол опаларининг БААда эмланиши танқид қилиниб, бундай “имтиёзлар” монархияни обрўсизлантириши айтилган.

Испанияда пандемия бошидан бери 3,1 млндан кўпроқ киши коронавирусга чалинган, улардан 69 мингдан кўпроғи вафот этган.