Танзила Норбоева келаси ҳафта Россияга боради

Фото: Олий Мажлиси Сенати ахборот хизмати

Олий Мажлис Сенати раиси бошчилигидаги делегациясининг Россия Федерациясига расмий ташрифи тўғрисида маълумот берилди.

2021 йил 13-16 апрел кунлари Олий Мажлис Сенати раиси Танзила Норбоева бошчилигидаги делегациянинг Россия Федерациясига (Москва ва Санкт- Петербург) расмий ташрифи бўлиб ўтади.

Сенат ахборот хизмати хабарига кўра, ташриф давомида Москва шаҳрида Ўзбекистон делегацияси Россия Федерал мажлиси федерация кенгаши раиси Валентина Матвиенко ва Давлат думаси спикери Вячеслав Володин билан учрашиши кутилмоқда.

Шунингдек, делегация аъзолари Ўзбекистон ва Россия парламентларининг юқори палаталари ўртасида ҳамкорлик бўйича комиссияси навбатдаги йиғилишида иштирок этади.

2021 йил 15-16 апрел кунлари делегация аъзолари Санкт-Петербург шаҳрида бўлиб, МДҲ Парламентлараро ассамблеясининг навбатдаги йиғилишида қатнашиши режалаштирилган.

Аввалроқ, Танзила Норбоева бошчилигидаги делегация Россияга ташриф буюриши кутилаётгани хабар берилганди.