Самарқандда «Камаз-35320» ва Isuzu юк машиналари тўқнашди

Самарқанд вилояти Булунғур туманида Камаз юк машинаси ўзидан олдинда ҳаракатланиб кетаётган Isuzu юк машинаси билан тўқнашган. Бу ҳақда вилоят ИИБ ЙҲХБ хабар бермоқда.

Маълум қилинишича, бугун, 29 май куни М39 Алмати-Тошкент-Термиз халқаро автомобиль йўлининг Булунғур тумани ҳудудидан ўтувчи 1060-километрида, Тошкент-Самарқанд йўналишида ҳаракатланиб келаётган «Камаз-35320» юк машинаси ўзидан олдинда ҳаракатланаётган Isuzu юк машинасининг орқа томонига келиб урилган. Оқибатда, ҳар иккала машина шикастланган.

Қайд этилишича, мазкур йўл-транспорт ҳодисасида ҳеч ким тан жароҳати олмаган. Аниқланишича, «Камаз-35320» ҳайдовчиси машинани бошқариб келаётганда чарчоқ туфайли ухлаб қолган ва бошқарувни йўқотган.

Эслатиб ўтамиз, бугун тонгда М41 Самарқанд-Бухоро-Туркманбоши халқаро автомобиль йўлининг Самарқанд шаҳридан ўтган қисмида Isuzu юк машинасининг ҳайдовчиси ҳам чарчоқ туфайли ухлаб қолган. Оқибатда машина Зарафшон дарёсининг қирғоғига ағдарилиб кетган.