Литвага мигрантлар билан боғлиқ инқирозни ҳал қилиш учун 10 млн евро берилади

Еврокомиссия Литвага Беларусь орқали ноқонуний миграция муаммосини ҳал қилиши учун 10 млн евро ажратади. Бу ҳақда ички ишлар бўйича еврокомиссар Илва Йоҳансон маълум қилди.

"Комиссия Литвани ушбу мураккаб, оғир вазиятни ҳал қилишда қўллаб-қувватлашга тайёр. Августда турли фондлардан 10 млн евро ажратилади", - деди у.

Беларусдан Литвага ноқонуний мигрантлар оқими қарийб 20 бараварга ошган, йил бошидан бери асосан Африка ва Яқин Шарқдан бўлган 1676 нафар мигрант қўлга олинган. 

ЕИ санкциялар киритганидан сўнг Беларусь президенти Александр Лукашенко республика Евроиттифоққа йўл олган мигрантларни тўхтатмаслигини айтганди.

12 июл куни Европа иттифоқининг ташқи чегаралар хавфсизлиги агентлиги («Фронтекс») миграцион инқироз кучайиши сабабли Литва ва Беларусь чегарасига ўз чегарачиларини жўнатиши хабар қилинди.