Навоий вилоятида жорий йилнинг январь-июнь ойларида 124 та йўл-транспорт ҳодисаси содир этилган. Шунинг 39 таси инсон ўлими билан боғлиқ. Бу ҳақда Навоий вилояти ИИБ ЙҲХБ ахборот хизмати раҳбари Фарруҳ Якубов 2 август куни ўтказилган брифингда маълум қилди.
Маълум қилинишича, автоҳалокатларнинг 27 таси тезликни ошириш, 15 таси пиёдаларга йўл бермаслик, 4 таси светофорга риоя қилмаслик, 5 таси қарама-қарши йўналишга чиқиш, 7 таси бошқарув пайтида ухлаб қолиш, 6 таси маст ҳолда машина бошқариш, 8 таси имтиёзга эга машиналарга йўл бермаслик, 4 таси йўл белгиларига амал қилмаслик натижасида содир этилган.
Брифингда пиёдалар, айниқса болалар иштирокидаги йўл транспорт ҳодисаларининг олдини олиш мақсадида Навоий шаҳрида «Вазиятлар маркази» ишга туширилгани, ушбу марказда шаҳардаги 23 та чорраҳада ўрнатилган 99 та камера интеграция қилинган ҳолда барча пиёдалар ўтиш жойларини тўлиқ назорат қилиш имкони яратилгани айтиб ўтилди. Таъкидланишича, марказда 3 нафар ходим томонидан бир вақтнинг ўзида 143 та камера назорат қилиб борилади.
Олдинроқ Навоийда «Nexia» ағдарилиб кетиши оқибатида ундаги йўловчи вафот этганди.
