Самарқанд шаҳрида жорий йилда 124та ёнғин содир бўлгани маълум қилинди

Жорий йил 9 ой давомида Самарқанд шаҳрида 124та ёнғин содир бўлган. Бу ҳақда Самарқанд шаҳар фавқулодда вазиятлар бўлими бошлиғининг ўринбосари Илҳом Ҳамроев иштирокида ўтказилган брифингда маълум қилинган.

Қайд этилишича, жорий йил 6 октябрь куни Самарқанд шаҳар фавқулодда вазиятлар бўлими бошлиғининг ўринбосари Илҳом Ҳамроев иштирокида брифинг ўтказилган. Брифингда И.Ҳамроев 9 ой давомида қилинган ишлар ва содир бўлган ёнғинлар ҳақида ҳисобот берган.

И.Ҳамроевнинг маълум қилишича, жорий йил 9 ой давомида Самарқанд шаҳридаги 60 минг 372та хонадонда профилактика ишлари олиб борилишига қарамай 124та ёнғин содир бўлган. Ёнғинларнинг асосий қисми очиқ оловдан фойдаланишда, электр мосламаларни ўрнатиш ва фойдаланиш қоидаларига амал қилмаслик, ёш болаларнинг қаровсиз қолдирилиши оқибатида содир бўлган.

Аввалроқ, Самарқанд вилоятида жорий йил 8 ой давомида 712та ёнғин содир бўлгани ва уларнинг 90тасида ёнғин келиб чиқишига ёш болалар сабаб бўлгани маълум қилинганди.