Кўклар ҳамон Лукаку ва Вернерсиз ўйнашда давом этмоқда, аммо лондонликларда ҳатто ҳимоячилар ҳам рақиб дарвозаси қаршисида даҳшатли кучга айланишади. Биринчи ҳужум чоғида мезбонлар дарвозаси тўсинига зарба йўллаган Чилуэлл ҳам бу ҳақда эслатди. Рюдигернинг голи эса — жамоа ҳимоя чизиғи вакилларининг мавсум бошидан бери урган 13-голи бўлди ва бу кўрсаткич АПЛнинг бошқа жамоалари ҳимоячилари урган барча голлардан кўпроқ. Бу эпизодда «Челси» ўзининг кучли томонларини намойиш этди, «тулкилар» эса энг ожиз томонини, Роджерс шогирдлари бу мавсумда стандарт вазиятлар вақтида бош билан берилган зарбаларни энг кўп ўтказиб юбормоқда.
Лекин бу биргина эпизод. Умуман олганда ҳам «Челси» рақибдан бир бош юқори эканини кўрсатди. Иккинчи голли ҳужум ҳам бу устунлик ифодаси эди, ҳужумни одатда рақиб ҳужумларини бузиш билан шуғулланадиган Канте аъло даражадаги маҳорат билан якунлади. Пешқадамларга танаффус ёрдам кўрсатгани яққол сезилди, танаффус арафасида «Челси» аутсайдер «Бёрнли»ни мағлуб этолмаганди. «Лестер» эса Брендан Роджерс «МЮ»га кетиши ҳақидаги хабарларга чалғигандек ўйин кўрсатмоқда, шотландиялик мураббий эса ҳозирча бундай миш-мишларни рад этмоқда.
«Уотфорд» — «Манчестер Юнайтед» — 4:1 (Кинг, 28. Сарр, 44. Жоау Педру, 90+2. Деннис, 90+6 — ван де Бек, 50).
Фото: JOHN WALTON/GETTY IMAGES
Бу вақтда «қизил иблислар»даги инқироз янада чуқурлашмоқда, Оле Гуннар Сульшерга босим ҳам кучаймоқда. Норвегиялик мутахассис, албатта, муваффақиятсизлик чоғида ҳам ижобий сўзлар топмоқда - у босим футболчиларни бор кучи билан ўйнашга мажбур қилаётганини айтмоқда. Аммо жамоадаги ҳолат ташқаридан ҳам кўриниб турибди, бош мураббийнинг матбуот анжуманидан кейин Лингард Instagram саҳифасида «Вест Ҳэм» формасида тушган суратини жойлаштирди.
Лондон клубига ижарага берилган вақтида ушбу яримҳимоячи жуда зўр ўйинлар кўрсатганди, аммо «МЮ»га қайтиб у яна асосий таркибга кира олмади. Ван де Бек Сульшерни қутқариб қолганида ғалати вазият юзага келган бўларди — у Сульшер мураббий бўлиб қолаётганидан энг кўп жабр кўраётган футболчидир. Захирадан ўйинга қўшилгач, нидерландиялик футболчи жуда ёрқин ўйин кўрсатди ва аввал ҳисобни қисқартирди, кейин шериклари учун бир неча бор вазиятлар яратди, аммо унинг иштирокидаги комбинация якунида Криштиану Роналду урган гол офсайд туфайли бекор қилинди.
Мавзуга оид
Португалиялик футболчи аввалроқ гол уриши керак эди, аммо бирга бир вазиятдан фойдалана олмади. Жамоа учун яна бир сезиларли зарба Магуайрнинг четлатилиши бўлди, бир киши кам бўлиб қолгач, «қизил иблислар» ўйинни қутқариб қолиш уёқда турсин, йирик ҳисобли мағлубиятдан ҳам қочиб қутула олмади ва қўшимча дақиқаларда икки гол ўтказиб юборди. Бу дақиқаларда Де Хеага ачиниш мумкин эди, у ҳисоб ҳали 0:0 эканида Саррнинг пенальтисини қайтарган, аммо тўпга биринчи бўлиб етиб келган Фемини дарвозани ишғол қилган, кейин бу вазиятда рақиб футболчиси жарима майдонига эрта кириб кетгани учун зарба қайтадан ижро этилган ва бу сафар ҳам дарвозабон зарба йўналишини тўсганди.
Ўйин якунида маълум бўлдики, испаниялик посбон шунчаки ҳалокат муддатини кечиктирганди ва энди Сульшер истеъфога чиқишига ҳеч ким шубҳа қилмаяпти. Ўйиндан кейин Де Хеа шундай деди: «Мураббий ва персонални айблаш осон, аммо баъзида айбдор футболчилар бўлади. «МЮ» бугун кўрсатган ўйинга қараб одам уялади. Биз кўрсатган бундай ўйинга йўл қўйиб бўлмайди». Жамоанинг бошқа бир футболчиси Фернандеш эса майдондаёқ мураббийни ҳимоя қилишни бошлаганди. Мухлислардан узр сўраш учун борган Сульшерга ҳуштакбозлик қилишди, Фернандеш эса, бир одам эмас, бутун жамоа айбдорлигини кўрсатиб, футболчиларга ишора қилди.
«Қизил иблислар» сўнгги етти турда биргина ғалабага эришди. The Times маълумотига кўра, ўйиндан кейин онлайн режимда «МЮ» директорлари кенгашининг шошилинч йиғилиши ўтказилган ва унда мураббийни ишдан бўшатиш ҳамда унга товон пули тўлаш масаласи муҳокама этилган. Бошқарув аъзоларининг кўпчилик қисми мураббийни истеъфога чиқариш қарорини ёқлаган, аммо, Sky Sports маълумотига кўра, якуний қарор ҳали қабул қилинмади.
Франция: Месси камчилик бўлиб қолган парижликларга ғалабани олиб берди
Барча Мессидан мўъжиза кутаётгани тушунарли, аммо парижликларнинг муаммолари фақатгина аргентиналик юлдузнинг таркибга мослашишидаги мураккаблик билан боғлиқ эмас. Авваллари — Унаи Эмери даврида ҳам, Томас Тухель даврида ҳам — тезкор гол одатда «ПСЖ»нинг ишончли ғалабасини таъминларди. Бу сафарги ўйинда ҳам Паредеснинг зарбасига Мбаппенинг оёқ қўйиши муваффақият дебочасидек кўринганди.
Фаворит нафақат бу устунликни ошира олмади, балки ўзига ўзи муаммо туғдириб олди. Марказий ҳимоячи ролини ижро этишга қарор қилган Кейлор Навас олдинга чиқди ва Бласани жарима майдонига киришидан олдин йиқитди. Мезбонлар бир киши кам бўлиб қолди ва бу «канарейкалар» жавоб голи уришига олиб келди.
Ўйинда бурилиш нуқтасига айланган эпизодда Месси оддий узатмани амалга оширди, аммо Аппиа уни тўсишда муваффақиятсиз ҳаракат қилиб, тўпни ўз дарвозаси «тўққизлиги»га йўналтирди, Лафонт бундай траекторияда ҳаракатланган тўпга ета олмасди.
Бу эпизод аргентиналик футболчидаги муваффақиятсизлик занжирини узди, у «ПСЖ»га келганидан буён фақат Чемпионлар лигасида гол урганди. Месси ўйин охирида ўз услубида юриш қилиб, жарима майдонига яқинлашган ҳолда чап оёғи билан кучли зарба йўллаб, устунликни оширди ва «Нант»ни бутунлай таслим қилди. Лигадаги илк голини ургунича Лео жами 21 зарба бериши талаб этилди, шундан саккизтаси дарвоза соҳасига тўғри борганди.
«Локомотив»га қарши ўйин учун Москвага сафар қилиш олдидан Маурицио Сарри ўзининг собиқ клуби билан учрашди, ўзи учун муҳим бўлган бу ўйин арафасида мураббий хотиржам бўлишга ҳаракат қилди. У журналистлар унга «Ювентус»даги даври муваффақиятсиз кечганини эслатишларига ишончи комил бўлган ҳолда, скудетто қўлга киритгани учун туринликлардан миннатдорлиги, Массимилиано Аллегри билан душманлиги ҳақидаги гаплар — мифлигини айтди.
Аммо биринчи бўлимдан кейин Сарри норози қиёфада эди. Унинг футболчилари ҳам танаффус арафасида Моратанинг йиқилишидан кейин қўйилган пенальти учун арбитрга эътирозларини билдиришди. Аммо ниманидир ўзгартиришнинг иложи йўқ эди, Бонуччи ҳисобни очганди. Энди римликлар иккинчи бўлимда ўз кучига таяниши керак эди, аммо Иммобиле жароҳат олгани туфайли «Лацио»да ресурслар чекланганди.
Бор имкониятлар билан туринликлар ҳимоясини доғда қолдириш имконсиз экани маълум бўлди. «Бьянконери»нинг қарши ҳужуми эса Кьезага жарима майдони ичида қўполлик ишлатилиши билан якунланди, нуқтага яқинлашган Бонуччи бу сафар ҳам Рейнага имконият қолдирмади. Сардорнинг фаолиятидаги илк дубли «Юве»га турнир жадвалида бешинчи ўриндаги «Лацио» билан очколар сони бўйича тенглашиб олиш имконини берди.
Миланликларнинг мавсумдаги илк мағлубияти оддий бўлиши мумкин эмасди. Бундай ўйинда нимадир рўй бериши керак эди ва бу — Тэтэрушанунинг қўпол хатоси эди. Бурчак зарбаси ижро этилганида дарвозабон хотиржамлик билан тўпга чиқиб, уни тутиб олди ва барча у жамоасининг тезкор қарши ҳужумини бошлаб беришига тайёр эди. Аммо тўп унинг қўлидан сирғалиб чиқиб кетди, ҳимоячилар тўпни узоқлаштириб юбора олмади, Данкан эса ҳимоясиз қолган дарвозани ишғол этди.
Бу ҳодиса ўйиндаги жараённинг мантиқий давом эди, «Милан» футболчилари ўйиннинг биринчи қисмида тўпни рақиб жарима майдони ҳудудига олиб бора олишмади, «фиалки» эса рақибга босимни дақиқа сайин ошираётганди. Бўлимга қўшиб берилган дақиқаларда эса Сапонара дарвозанинг узоқ «тўққизлиги»ни аниқ нишонга олди. Иккинчи бўлимда Влаҳович қарши ҳужумни гол билан якунлагач, ўйиндаги барча масала ҳал бўлгандек кўринганди.
Фақат шу куни 40 ёш-у 48 кунлик бўлган Ибраҳимович бунга рози эмасди, у А серия тарихидаги энг кекса дубль муаллифи бўлди ва жамоани қутқариши ҳам мумкин эди. Фақат Влаҳович бу мавсумда Златандан кучлироқ ўйнамоқда. Ушбу сербиялик барчасини ўзи ижро этди ва интригага барҳам берди. Қўшимча дақиқалар сўнггида Ибраҳимовичнинг бош билан йўллаган зарбаси тўсиндан қайтиб, автогол рўй берганда эса ўйинни қутқаришга кеч бўлганди. Агар «Наполи» якшанба куни «Интер»га ютқазмаса, Лучано Спаллетти Неаполга яккапешқадам бўлиб қайтади ва унинг жамоаси Европада мавсум бошидан буён чемпионат ўйинларида ютқазмаётган ягона жамоа бўлиб олади.
Алексей Миранчук яна ўйнамади ва бутун ўйинни захира ўриндиғида ўтказди. Жан Пьеро Гасперини сўнгги дақиқаларда, ҳисоб йирик кўриниш олганида ҳам россиялик легионерни эмас, ёш футболчиларни майдонга туширишга қарор қилди. Бошқалар эса ўзини яхши томондан кўрсатишди. «Специя»га қарши ўйинда ҳужум чизиғининг барча вакиллари номини таблога ёздириб қўйди, Муриэль нафақат ўзи гол урди, балки Малиновскийга ассистентлик ҳам қилди.
ЕЧЛга йўлланма берадиган квартетдаги позициясини мустаҳкамлаган «Аталанта» қаторасига олти турда мағлуб бўлмади. Шу билан бирга, шанба оқшомидаги ғалаба — жамоанинг 21 сентябрдан буён ўз уйида илк ғалабаси бўлди, шундан кейин жамоа «Милан»га мағлуб бўлган ва икки ўйинда дуранг ўйнаганди.
Андалусияликлар кунни биринчи ўринда якунлашди, аммо улар мавжуд вазиятдан қониқиш ҳосил қилмаётгани тайин. Якшанба кунги ўйинларда Хулен Лопетеги жамоасини «Реал Сосьедад» ва «Реал» қувиб ўтиши мумкин. Шу билан биргаликда, қўшимча дақиқаларда мағлубиятдан қутулиб қолган «Севилья» ўз характери билан фахрлана олиши мумкин. Оқшом қаҳрамони Ракитич бўлди, у 55 гол билан ла лигадаги энг сермаҳсул хорватияликлар рўйхатида иккинчи бўлиб турибди. Буни унинг амплуасидан келиб чиққан ҳолда ажойиб натижа дейиш мумкин, у албатта, ҳисобида 113 гол бўлган афсонавий Шукер билан рақобатлаша олмайди.
«Атлетико» — «Осасуна» — 1:0 (Фелипе, 87).
«Осасуна» — ла лигадаги энг агрессив меҳмон жамоа ҳисобланади. Бу жамоа мавсумни сафар ўйинларидаги тўрт ғалаба билан бошлаганди, шундан кейин «Сантьяго Бернабеу»да дуранг ўйнаб берди ва Бенземанинг голли сериясини тўхтатди. Ҳа, чемпионатдаги танаффус арафасида памплоналиклар «Севилья» майдонидан мағлуб бўлиб қайтишди, аммо «Атлетико» бу нақадар жиддий рақиб эканини ҳисобга олган ҳолда тайёрланиши керак эди. Амалда ҳам бу рақиб фақат сўнгги дақиқаларда таслим этилди - Фелипе бурчакдан тўп узатилганда ҳисобни очди. Ушбу бразилияликдан ташқари ғалабада дарвозабон Облакнинг ҳиссасини ҳам эътироф этмоқ керак, у Торреснинг бурчакка йўналтирган зарбасини қайтариб, ғалабани сақлаб қолди, қолаверса, Диего Симеоне жамоаси барча ўйинларда характер кўрсатиб келмоқда, мавсум бошидан буён «матрасчилар» 85-дақиқадан кейин урилган голлар туфайли 7 очко ишлашди. Жамоа бу борада «Осасуна»дан икки очко ортда.
Интрига учун ҳар қандай ишора — Бундеслигада байрам. Жума куни «Бавария» «Аугсбург»га сенсацион равишда мағлуб бўлгач, кўпчилик бундан хурсанд бўлди, айниқса — Дортмунддагилар. «Боруссия» ўз ўйинида осонлик билан ғалаба қила олмади, лекин якунда «асаларилар» етакчи билан орадаги фарқни биттагача қисқартиришди.
Марко Розе шогирдлари голсиз биринчи бўлимдан кейин иккинчи бўлим бошида тезкор гол уришди, аммо ҳисобдаги устунлик бир неча дақиқагина сақланиб турди, аммо якунда ажойиб қарши ҳужум Ройснинг аниқ зарбаси билан ғалаба келтирди. Дортмундликлар ўз сардорининг ҳаракатлари туфайли чемпионатни ўз тарихида илк бор 7 уй учрашувидаги ғалаба билан бошламоқда.
Кун статистикаси
«Арсенал» дарвозасига АПЛ ўйинларида 100-голини урган илк жамоа «Ливерпуль» бўлди. Қизиллар аввалроқ «Ньюкасл» (105) ва «Тоттенҳэм»га (100) қарши ўйинларда ҳам бундай нуқтадан ўтишганди.
Менхенгладбаҳнинг «Боруссия» жамоаси ҳужумчиси Штиндль фаолиятида илк бор бир ўйинда 3та голли узатмани амалга оширди.
9 йил ва 324 кун давомида АПЛда гол урмаган ҳимоячи Ҳэнли қўшимча дақиқаларда гол уриб «Норвич»га «Саутҳемптон» устидан ғалаба келтирди.
Туркиянинг амалдаги чемпиони «Бешиктош»да миллий биринчиликда 20 йилдан буён сафар ўйинларида қаторасига тўрт мағлубиятдан иборат серия қайд этмаганди. Жамоа барча турнирлар доирасида сафар ўйинларида қаторасига 6 мағлубият қайд этди, ички чемпионатда пешқадамдан 10 очко ортда қолиб, еттинчи ўринда бормоқда.
«Ньюкасл» ўзининг собиқ футболчиларидан 50-марта гол ўтказиб юборди. Юбилей зарба муаллифи «Брентфорд» ҳужумчиси Тони бўлди.
«Бёрнли» ҳужумчиси Вуд АПЛда 50-голини урди, у турнир тарихидаги энг сермаҳсул янгизеландиялик бўлиб турибди.
